Aqtóbedegi velosherýge zeınetkerler qatysty
Aqtóbede Astana kúnine velosherý ótti. Sherýge qala ákimi Іlııas Ispanov ta qatysty. Qalanyń bas dańǵyldarymen júrip ótken velosıpedshiler salaýatty ómir saltyn nasıhattap, zeınetkerler jastarǵa úlgi boldy.
«Velosherýge alǵash ret qatystym. Túnde jumysta bolyp, tańerteń velosıpedimmen oblys ákimdiginiń aldyna jettim. Sherý týraly júgirtpe joldan kórgen bolatynmyn. Bul óte jaqsy ıdeıa. Balalar salaýatty ómir saltyn ustanyp, sportpen shuǵyldanýy kerek. Velosıpedti nemeremnen aldym. Olar menen úlgi alady dep oılaımyn», - dedi velosherýge qatysýshy Jumabaı Otarǵalıev.
Zeınettegi temirjolshy voleıbol, basketbol sııaqty sport túrlerimen shuǵyldanady. Álemdik jarystardy qalt jibermeı qaraıdy, el namysyn qorǵap júrgen sportshylar týraly málimetterdi jaqsy biledi.
Merekelik velosherýge qatysýshy Qasym Kanavalov ta alǵash ret qala kóshelerimen júrip ótti. Velosıpedpen serýendeýdi jón kóretin kásipker úshin 16 shaqyrymdyq esh qıyndyq týǵyzbaǵan.
«Biz 16 shaqyrymdy 1 saǵatta júrip óttik. Velosherýge zeınetkerler men jastar qatysty. Dál osyndaı qoǵamdyq sharaǵa atsalysyp, qoldaý kórsetý qala turǵyndarynyń paryzy dep bilemin. Ári bul densaýlyq úshin paıdaly. Jastar úıde otyryp, kompıýter men telefonǵa úńilip, ýaqyt ótkizedi. Sol ádetti tastap, sportpen shuǵyldanǵan abzal. Biz salaýatty ómir saltyn ustanýǵa shaqyramyz»,- dedi Q.Kanavalov.
Aıta keteıik, velosherýge qatysýshylardy oblys ákimi Berdibek Saparbaev qarsy alyp, olarmen estelik sýretke tústi.
