Aqtóbedegi úzdik ýchaskelik pýnktke mınıstrlik avtokólik syılady
AQTÓBE. QazAqparat - Aqtóbedegi úzdik ýchaskelik pýnktke Іshki ister mınıstrliginiń syılyǵy tabys etildi, dep habarlaıdy QazAqparat tilshisi.
Aqtóbe oblysy boıynsha №9 ýchaskelik pýnkt úzdik dep tanyldy. Memleket basshysy Qasym-Jomart Toqaevtyń qatysýymen ótken vedomstvo alqasynyń sońǵy otyrysynda Іshki ister mınıstri Erlan Turǵymbaev jańa qyzmettik avtokólik beriletinin aıtty. Kóp uzamaı ýáde oryndalyp, kólik kilti tabys etildi.
«2016 jyldan beri ýchaskelik ınspektor bolyp qyzmet atqaryp júrmin. Mınıstrlik syılyǵy - bizdiń jumysymyzdyń kórsetkishi. Ákimshilik aımaqta halyqpen tyǵyz qarym-qatynas jasap, árbir shaǵym, aryz ýaqytyly sheshilip jatyr. Barlyǵy 9 aıdyń qorytyndysy boıynsha kórsetkish joǵary, sol úshin de alǵysqa bólenip otyrmyz. Kólik bizge qajet. Aýmaq keń, kómek suraıtyndar kóp. Der kezinde jetý úshin syıǵa bergen tehnıkany paıdalanymyz. Mańyzdysy – aldyn alý jumystary», - dedi ýchaskelik ınspektor Dastan Sultanǵalıev.
Polıtsııanyń mindeti – azamattardyń tynyshtyǵyn qorǵaý, qoǵamdyq tártipti jáne azamattarymyzdyń qoǵamdyq qaýipsizdigin qamtamasyz etý. Oblystyq PD bastyǵy Atyǵaı Arystanov Jergilikti polıtsııa qyzmeti basqarmasynyń bazasynda garnızondyq aýysý jáne qoǵamdyq tártipti saqtaýǵa, azamattardyń qaýipsizdigin qamtamasyz etýge jumyldyrylǵan polıtsııa qyzmetkerlerine nusqama berdi. Qala kósheleriniń tynyshtyǵyn kúzetetin toptyń daıyndyǵyn kórdi.
