Aqtóbedegi tórt muǵalimniń ólimi: sot otyrysy bastaldy

AQTÓBE. QazAqparat – Qobda aýdandyq sotynda tórt muǵalimniń ólimine ákep soqqan jol-kólik apatyna qatysty sot otyrysy bastaldy. Sottalýshy qatty ókinetinin, jaǵdaıdyń qalaı bolǵanyn ózi de anyq bilmeıtinin aıtty, dep habarlaıdy QazAqparat tilshisi.

Samara-Shymkent tasjolyndaǵy jol-kólik oqıǵasy bıyl maýsym aıynda boldy. Onda kólik júk kóligine soqtyǵysyp, tórt muǵalim kóz jumdy. Keıin Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha aıyp taǵylǵan júrgizýshi qamaýǵa alyndy.

Sot Qobda aýdandyq sotynda búgin bastaldy. Sot otyrysy kezinde aıyptaý aktisi oqyldy. Al sottalýshy oqıǵanyń mán-jaıy qalaı bolǵanyn anyq túsindirip bere almady.
«Sol kúni tańǵy saǵat 6:30 shamasynda shyqqan bolatynbyz. Jalpy, uıqym qanyp shyqtym, ishpegenmin, bári jaqsy bolatyn. Jympıtydan janar-jaǵarmaı beketine soqqanymyz esimde bar. Odan keıin ne bolǵany esimde joq. Bolǵan jaǵdaıdan keıin aýrýhanada esimdi jıdym. Eki kún jansaqtaý bóliminde jattym. Ne bolǵanyn bilmeımin. Bolǵan jaǵdaıǵa qatty ókinemin, jábirlenýshilerden keshirim suraımyn. Ádeıi emes, abaısyzda bolǵan jaǵdaı. Bul jaǵdaı kim-kimge de ońaı bolǵan joq. Osyny oılap uıqy joq, kúni-túni. Buryn-sońdy tasymaldap júrgenmin. Tabys kózim sol. Tek basqa óńirlerge shyǵyp kórgen joqpyn, birinshi ret edi», - dedi sot otyrysy kezinde júrgizýshi Asyljan Koshtan kózine jas alyp.
Aıta keteıik, sot otyrysyna jábirlenýshiler men olardyń týǵan-týysqandary qatysyp jatyr.