Aqtóbedegi terrorlyq aktiden soń múgedek bolyp qalǵan polıtseıge páter berildi
2016 jyly Aqtóbe qalasynda terrorlyq akt bolyp, qarýly top birneshe qarý-jaraq dúkeni men áskerı bólimge basyp kirdi. Sol kezde oqıǵa ornyna alǵashqylardyń biri bolyp jetken polıtsııa qyzmetkeri Álibek Jetiǵarın búgin baspanaly boldy.
«Álibek Jetiǵarın 2014 jyly polıtsııa qyzmetkeri atanyp, jol-patrýl batalonynda jumys istedi. Ol 2016 jyldyń 5 shilde kúni terrorıstik akt bolǵan kezde alǵashqylardyń biri bolyp oqıǵa ornyna jetti. Sol kezde oq tıip, aýyr jaralandy. Baýyryna zaqym kelip, oń qolyna oq tıdi. Qazirgi kezde oń qoly durys jumys istemeıdi. Sondyqtan múgedektik berilgen. QR «Quqyq qorǵaý qyzmeti týraly» Zańy aıasynda qyzmetker 4 aı em ala alady. Al asa aýyr bolsa 9 aı ǵana em qabyldaýǵa ruqsat berilgen. Biz 2 jyl ýaqyt berdik, biraq densaýlyǵyn qalpyna keltirý múmkin bolmady. Sondyqtan 2018 jyldyń qarasha aıynda polıtsııa departamentinen jumystan shyǵaryldy. Biraq, ony men eńbek demalysynda júrgen kezde habarlap, aıtpaǵan. Búgingi isimizdi aıtqyzbaı-aq isteýimiz kerek edi. Sondyqtan jumystan shyǵarý týraly sheshimge qol qoıǵan eki qyzmetkerdiń ózi jumystan ketip, birneshe basshy jazalandy. Álibekke 2 jyldyq jumysta 6 ret syıaqy taǵaıyndaldy, onyń úsheýi QR ІІM buıryǵymen berildi. Eshqandaı eskertý almaǵan polıtsııa qyzmetkeri sol oqıǵadan soń «Erligi úshin» medalimen marapattaldy. Qazirgi kezde Álibekke 2 bólmeli qyzmettik páter berilip otyr. Polıtsııa qyzmetkerleriniń bári 1 kúndik jalaqysyn aýdardy. Bul - 7,5 mıllıon teńge. Sonymen qatar, polıtsııa departamenti tóleýi tıis 1,5 mıllıon teńgeni aýdardy. «Darý» ońaltý ortalyǵymen arnaıy baǵdarlama jasalyp, em qabyldaıdy», - dedi Aqtóbe oblystyq polıtsııa departamentiniń bastyǵy Mahambet Abısatov.
Aıta keteıik, jumyssyz qalǵan burynǵy polıtsııa qyzmetkeri aldaǵy ýaqytta jalaqysynyń 50 paıyzyn alyp otyrady. Sonymen qatar, polıtsııa departamentiniń bastyǵy Aqtóbe qalalyq sal aýrýyna shaldyqqandardy qoldaý ortalyǵynyń tóraıymy Quralaı Baımenovamen habarlasyp, jańa is bastaýǵa keńes berdi. Tipti bıznes ashý múmkindigi bar ekenin jasyrmady.
«Biz de kómek kórsetemiz. Árbir polıtsııa qyzmetkeri erlik umytylmaıtynyn bilýi kerek. Álibektiń erligin eshkim umytpaý tıis. Alǵys aıtamyz. Ol bizdiń janymyzda bolady. Onyń sýreti polıtsııa departamentinde ilýli tur, bári úlgi tutady», - dedi Mahambet Abısatov.
Aıta keteıik, Álibek Jetiǵarın quqyqtaný mamandyǵy boıynsha bilim alyp, keıin Otan aldyndaǵy boryshyn ótegen. Týǵan jerge qaıta oralǵan soń polıtsııa qyzmetkeri atandy.
«Sol kúni shaqyrý túsip, biz barǵan kezde «Pallada» qarý-jaraq dúkeninen bir top shyǵyp kele jatty. Qarýly qarsylyq kezinde ish-qurylysyma, qolyma oq tıdi. Aýrýhanada uzaq ýaqyt emdelip, shyqtym. Qazir páterli bolyp jatyrmyn, alǵysymdy aıtamyn. Ózimniń bir qyzym bar, jubaıym ekinshisine júkti»,- dedi Álibek Jetiǵarın.
