Aqtóbedegi terrorıstik qaýip turǵysynan osal nysandar tótenshe oqıǵaǵa daıyn emes - ІІD
AQTÓBE. QazAqparat - Aqtóbede 700-den astam nysan terrorıstik shabýyl turǵysynan osal bolyp sanalady. Bıyl oblystyq ishki ister departamenti 200-den astam ǵımaratty tekserip, kemshilikterdi anyqtady, dep habarlady QazAqparat tilshisi.
Aqtóbedegi memlekettik, strategııalyq, ónerkásiptik nysandar sany 700-den asyp ketken. Munyń bári terrorıstik turǵyda osal nysandar qataryna jatady. Olarda baqylaý-ótkizý beketteri, ınjenerlik-tehnıkalyq jabdyqtalýy joǵary kúzet qyzmeti bolýy tıis. Bul jumysshylar men qyzmetkerlerdiń qaýipsizdigin qamtamasyz etetin shara.
«Nysandardaǵy qaýipsizdik sharasynyń talaptary arnaıy bekitilgenimen, óńirde birqatar mekemelerdiń qorǵanys sharalary qanaǵattanarlyq deńgeıde emes. Jyl basynan beri Aqtóbe oblysy ІІD-niń jumys toby 256 nysandy tekserdi. Onyń 24-i asa mańyzdy memlekettik nysan, 19-y strategııalyq, 11-i qaýipti óndiristik jáne 202-si adamdar kóp shoǵyrlanatyn jer. Tekserý nátıjesinde 183 nysannyń jaýapty jetekshileri men mamandaryna kemshilikterdi joıý nusqamasy jiberildi», - dedi oblystyq ІІD baspasóz qyzmetiniń jetekshisi Nurgúl Qonaqbaeva.
Tekserý nátıjesinde Ákimshilik quqyqbuzýshylyq Kodekstiń «Terrorıstik turǵydan osal obektiniń terrorızmge qarsy qorǵalýyn qamtamasyz etý jáne qaýipsizdiginiń tıisti deńgeıin saqtaý jónindegi mindetterdi oryndamaý jáne (nemese) tıisinshe oryndamaý» baby boıynsha boıynsha 10 ákimshilik quqyqbuzýshylyq týraly hattama toltyryldy. Taǵy úsheýi Kodekstiń «Memlekettik organdardyń laýazymdy adamdary ózderiniń quzyreti sheginde bergen zańdy talaptardy nemese nusqamalardy, usynýlardy, qaýlylardy oryndamaý nemese tıisinshe oryndamaý» baby boıynsha aıyppul tóleıdi.
