Aqtóbedegi terakt týraly derekti fılm TMD elderiniń festıvaline qatysýda
Fılmde qoǵamymyzdaǵy ózekti máselelerdiń biri - din jolyndaǵy adasýshylyq týraly baıandalady.
«Negizgi epızod - dúıim eldi dúrliktirgen, birneshe adamdardyń ómirin qıyp, 40-qa jýyq jergilikti turǵyndardy jaralaǵan qandy oqıǵa - 2016 jyly 5 maýsymda Aqtóbedegi terakt. Bul fılm muraǵat materıaldaryna, lańkesterdiń shabýylynan aman qalǵan jandardyń, dástúrli emes ıslam aǵymyn ustaýshylardyń jaqyndarynyń estelikterine negizdelgen», - delingen habarlamada.
«Eýrazııa.DOC» atty úshinshi TMD elderiniń derekti kıno festıvali Mınsk qalasynda 1-4 qazan aralyǵynda ótip jatyr.
Aıta keterligi, festıvaldiń irikteý komıssııasy TMD elderiniń qoǵamdyq-saıası ómirine tikeleı nemese janama qatysty oqıǵalardy qozǵap, avtorlyq taldaý jasalǵan fılmderdi qabyldaıdy.
Bıyl festıvalǵa qatysýǵa 23 elden 150 fılm úmit bildirgen. Onyń ishinen negizgi baıqaýǵa 12 eldiń 24 derekti fılmi iriktelindi. Nátıjesinde, baıqaýǵa Ázerbaıjan, Armenııa, Belarýs, Qazaqstan, Qyrǵyzstan, Latvııa, Lıtva, Moldova, Reseı, Tájikstan, Ózbekstan jáne Estonııa elderiniń tanymal jáne jas býyn kınodokýmentalısterdiń fılmderi qatysady. Festıvaldiń jeńipmazdaryn tanymal kınogerler, saıasatker men jýrnalısterden quralǵan halyqaralyq qazylar alqasy anyqtaıtyn bolady.
Ásııa Baıǵojına - kınodramatýrg, kınorejısser, Qazaqstan kınematografıster odaǵynyń múshesi. 1987 jyly KSRO Memlekettik kıno janyndaǵy stsenarıster men rejısserler daıyndaıtyn joǵary kýrsyn bitirgen. 1991 jyly Ásııa Baıǵojına óziniń alǵashqy rejısserlik jumysy -Jeltoqsan oqıǵasyna arnalǵan «Jarııalanbaǵan sherýdiń hronıkasy» atty derekti fılmi jaryq kóredi.
Eske sala ketsek, «Senim jolynda» derekti fılmin QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ QR Din isteri jáne Azamattyq qoǵam mınıstrliginiń qoldaýymen túsirgen.
Aıta keteıik, Aqtóbede terakt 2016 jyly 5 maýsymda boldy. Terrorısterdiń toby «Pallada» jáne «Pantera» atty qarý-jaraq dúkenderi men №6655 áskerı bólimine qaraqshylyq shabýyl jasap, sonyń saldarynan 8 adam mert boldy. Olardyń 3-ýi áskerı qyzmetkerler. Terrorızmge qarsy baǵyttalǵan operatsııa barysynda 18 adamnyń kózi joıylyp, 9 adam quryqtaldy.
