Aqtóbedegi tennıs ortalyǵynda qazaq balalary kemsitýshilikke ushyrap júr
Aqtóbedegi Kirpishti aýdanynda ornalasqan tennıs ortalyǵy 2009 jyly paıdalanýǵa berilgen edi. Sol jyly kúzde Elbasy Nursultan Nazarbaev jańa nysannyń qurylysymen tanysyp, tipti, jas raketka sheberimen tennıs oınady. Sodan beri demalyssyz jumys istep kele jatqan ortalyqta oblystyq, respýblıkalyq, tipti, halyqaralyq deńgeıdegi jarystar uıymdastyryldy. Ókinishtisi, ortalyq qazaq balalaryna qol emes bolyp tur. Óıtkeni orys tilin bilmeıtin, bul tilde sóıleı almaıtyn balalar tennıs ortalyǵynan eshteńe úırene almaıdy.
«Balam eki jyldan beri tennıs úıirmesine qatysyp júrgen edi. Jaqynda deńgeıin baıqaý úshin konkýrsqa qatystyrǵan edik. Kórip, ashýlandym. Ol qarapaıym oıyn erejesin bilmeıdi, túsinbeıdi. Basynda qushtarlanyp edi. Keıinnen tennıs úıirmesine baratyn kezde kóńili túsip, tartynshaqtaı beretin boldy. Barǵysy kelmeıdi. Mán bermegen edik. Keıin suraı kele onyń bul oıynǵa qyzyqqanymen, jattyqtyrýshylardyń tilin túk túsinbeıtinin bildik. Birde-bir jattyqtyrýshy qazaq tilinde dáris bermeıdi eken. Bul qalaı? Qazaq balalaryn kemsitýshilik emes pe? Sonda qazaq balalary úshin úlken tennıs korty jabyq pa?»,- deıdi jýrnalısterge shaǵymdanǵan ata-ana.
Osy máselege úńilsek, shaǵym oryndy ekenin ańǵardyq. Aqtóbedegi tennıs ortalyǵynda qazaq tilinde dáris beretin birde-bir jattyqtyrýshy joq. Ortalyq dırektory Raýshan Manteeva orys tilin túsinbeıtin, bilmeıtin balalardyń bar ekenin jasyrmady. Al olarmen jumys qalaı bolady? Ol jaǵy da túsiniksiz. Tipti, qazir bylaı tursyn aldaǵy 6-7 jylda qazaq tilin biletin jattyqtyrýshy keledi degen úmit te joq sekildi.
«Ras. Bizde qazaq tilinde dáris beretin jattyqtyrýshy joq. Bir jattyqtyrýshymyzdyń ulty qazaq, biraq qalada ósken soń óz oıyn qazaq tilinde jetkizip aıta almaıdy. Tennıs elimiz boıynsha eń jas sport túrine jatady. Bizge, jalpy Qazaqstanǵa keletin jattyqtyrýshylar shetelden shaqyrylady. Sondyqtan tildik qıyndyqtar týyndap tur. Bul máseleni Tennıs federatsııasyna aıtyp, jetkizdik. Aqtóbedegi máseleni sheshý úshin áli 6-7 jyl ýaqyt kerek. Biz óz balalarymyzdy tárbıeleý úshin uzaq jyl ter tógemiz. Al qazir jattyqtyrýshymyz erejeniń bárin oryssha túsindiredi. Tek dop, at, tur, júr degen sózderdi biledi. Termınologııasyn aıta almaıdy. Sondyqtan ózi oınap kórsetedi, dopty urady. Túsingen balalar janyndaǵy túsinbegen balalarǵa aıtyp, jetkizedi. Qıyndyq týsa, ortalyqtaǵy ádiskerlerdiń kómegine júginedi»,- dedi ortalyq dırektory Raýshan Manteeva.
Aıta keteıik, Aqtóbedegi tennıs ortalyǵynda 250 bala jattyǵady. Barlyǵy 7 jattyqtyrýshy bar. Onyń úsheýi Ózbekstannan kelgen. Ortalyq jattyqtyrýshylarǵa qazaq tilin bilý kerek degen talap qoımaıdy eken. Sondyqtan bolar, 8 jyldan beri birde-bir qazaq toby ashylyp, jumys istemegen. «Qazaqtarǵa oryssha úırený ońaı ǵoı. Ózge ult ókilderine qazaqsha úıretý qıyn bolyp tur. Biraq úırenip jatyr»,- dedi Tennıs ortalyǵynyń dırektory Raýshan Manteeva.
