Aqtóbedegi «Táýelsizdik monýmenti» súrilýi múmkin
AQTÓBE. QazAqparat - Aqtóbe qalasynyń bas dańǵylyndaǵy «Táýelsizdik monýmenti» súrilýi múmkin. Almatydaǵy monýmenttiń shaǵyn kóshirmesi 2008 jyldyń jeltoqsanynda ashyldy. Jergilikti bılik pen kásipker sottasyp, qala ákimdigi jeńiske jetti, dep habarlaıdy QazAqparat tilshisi.
Aqtóbe qalasyndaǵy «Nurdáýlet» saýda úıi qala halqy men qonaqtaryna jaqsy tanys. Bul jerde «Nurdáýlet» meshiti de bar. Kásipker 2008 jyly táýelsizdik kúni qarsańynda «Táýelsizdik monýmentiniń» shaǵyn kóshirmesin ornatty. Ashylýyna qoǵam qaıratkeri Muhtar Shahanov qatysyp, jergilikti ákimdiktiń qyzmetkerleri de kelgen. Al búgin munyń bárin qalalyq ákimdik joqqa shyǵaryp otyr.
«Monýment kóshirmesin ornatyp, arnaıy Muhtar Shahanovty shaqyrǵan edik. Qala, oblys ákimdiginen memlekettik qyzmetkerler keldi, kórdi. Jyl saıyn aýmaq abattandyrylady. Sóıtip júrgende 2016 jyldyń jeltoqsanynda «alyp tastaý kerek» degen sheshim shyǵardy. Bul uıat boldy. Elimiz boıynsha Almatydan bólek Shymkent, Qaraǵandy, Aqtóbede bar mundaı monýment»,- dedi kásipker Maqsat Baıjarqynov.
Monýment kóshirmesin qoıǵan kezde arnaıy qujat rásimdelmegen, tirkelmegen. Eger qujattaryn durystaý qajet dese, kásipker zańǵa sáıkes retteýdi jón kórip otyr. Biraq buzýǵa jol bermeıdi, Joǵary sotqa aryz jazady.
«Táýelsizdigimizdiń belgisin buzýǵa biz jol bermeımiz. Jergilikti ákimdik «zoobaqqa dep ákelgen kerikti al» dedi, ony alyp tastadyq. Balalar alańyn, ondaǵy attraktsıondardy basqa jerge kóshire alamyz. Biraq monýmentti saqtap qalamyz. Qajet bolsa halyqaralyq uıymdardan kómek suraımyz. Halyq bizdi qoldaıdy dep senemiz. Bul bizdiń teńdigimiz ben azattyǵymyzdyń kórinisi»,- dedi kásipker.
Aıta keteıik, jergilikti ákimdik Aqtóbe qalasynyń Ábilqaıyr han dańǵyly boıyna jaıaý júrginshiler býlvaryn jasaý týraly jobany daıyndap, turǵyndarǵa tanystyryp úlgerdi. «Qazirgi zamanǵy talaptarǵa saı, shaǵyn sáýlettik nysandar, balardyń oıyn-saýyq alańdary, sportpen, dene shynyqtyrýmen aınalysý úshin alańdar, sýretshiler men mýzykanttar ónerin kórsete alatyn oryndar, ıaǵnı Máskeý qalasyndaǵy Arbat kóshesi sekildi qalalyqtar men qala qonaqtarynyń demalysy úshin jaqsy bir aımaq uıymdastyrýǵa múmkindik beredi»,- dep habar taratty Aqtóbe qalasynyń ákimdigi. 
