Aqtóbedegi taý-ken baıytý kombınatynda jarylys bolyp, bir jumysshy kóz jumdy
AQTÓBE. QazAqparat – Hromtaý aýdanyndaǵy Dóń taý-ken baıytý kombınatynda jarylys bolyp, bir adam qaza tapty, dep habarlaıdy QazAqparat tilshisi.
Qaıǵyly oqıǵa 16 tamyz kúni saǵat 11:45-te bolǵan. Bul týraly habarlama oblystyq eńbek ınspektsııasy basqarmasyna tústi.
«Taý-ken baıytý kombınatynyń shahtasynda jarylys jumystary júrgizilgen. Sol kezde eki adam tolqynnyń astynda qalyp qoıǵan. Jumysshy áıel kóz jumdy. Al ýchaskelik marksheıder aýdandyq aýrýhanaǵa jetkizildi. Arnaıy komıssııa quryldy. Barlyq memlekettik organ ókili quramyna kiredi. Tergep, tekserýden soń sebebi anyqtalady», - oblystyq eńbek ınspektsııasy basqarmasy basshysynyń orynbasary Talǵat Iskarın.
