Aqtóbedegi sý tasqynynan zardap shekkenderge mańǵystaýlyq munaıshylar 52 mln teńge aýdardy
«Qolǵanat Aqtóbe» qoryna bir aıda barlyǵy 124 mıllon teńgeden astam qarjy túsken, dep habarlaıdy QazAqparat tilshisi.
Aqtóbedegi sý tasqyny kezinde qalalyq ákimdik arnaıy komıssııa quryp, «Qolǵanat Aqtóbe» qoryna bir kúndik jalaqyny aýdarýǵa shaqyrǵan bolatyn. Óńir basshysy Berdibek Saparbaev aýdan ákimderine kómektesý týraly tapsyrma berdi. Tipti aýylǵa kóship baratyndar tabylsa, jer telimin bólip, jumyspen qamtamasyz etýge shaqyrdy. Sóıtip qorǵa bir aı ishinde 124 mıllon teńge jınaldy. Bárinen mańǵystaýlyq munaı kompanııasy mol qarjy aýdardy. Munaıshylar esepshotqa 52 mıllıon teńge salǵan.
«Qazaqstannyń basqa qalalary mundaı komaqty qarjy jınaǵan joq. Munaı kompanııasy men ekinshi deńgeıli bank aqsha aýdaryp, qor aqshasy bir mezetti 62 mıllıonǵa tolyqty. Qazir komıssııa sheshimimen zardap shekkenderge 32 mıllıon 737 myń teńge berildi. Kún saıyn 15:00-den keshki saǵat 18:00-ge deıin sý tasqyny kezinde zardap shekken adamdardy qabyldaımyz, al túngi saǵat 21:00-ge deıin aqsha bólip beremiz. Kúnine 50-60 adamdy qabyldap, aryz-shaǵymyn tyńdaımyz. Bári qaıyrymdylyq sharasy»,- dedi qordyń jetekshisi Altynaı Ereshqyzy.
Buǵan deıin habarlaǵanymyzdaı , baspanasy qulap qalǵandarǵa 1 mıllıon teńgeniń sertıfıkaty tapsyrylǵan bolatyn. Qazirgi kezde jer telimi berilip, 1 mıllıon teńgeniń sertıfıkaty úlestirilgen adamdarǵa tıesili aqshanyń 30 paıyzy qurylys kompanııasynyń esepshotyna aýdaryldy. Bul - 15 mıllıon 600 myń teńge.
«Qurylys kompanııalary qajetti zattardyń keıbirin tegin jetkizip berip jatyr. Keıbirin óz aqshasyna tasymaldaıdy. Sý tasqynynan zardap shekkenderge tek qazaqstandyqtar ǵana emes, reseılikter de kómektesti. «Kıvı koshelekte» 1,6 mıllıon teńgeden astam qarjy bar. Biri 100 myń salsa, biri 2 myń teńgesin aýdardy. Adamdar qoldan keler kómegin berip jatyr. Aqsha aýdarý qarqyny báseńdegenimen, áli de bolsa qor tolyǵýda. Máselen, Mańǵystaý oblysynyń belsendiligi joǵary. Olar áli de esepshot nómirin surap jatyr»,- dedi A.Ereshqyzy.