Aqtóbedegi sý tasqynynan soń 17 adamnan turatyn bir áýletke 30 myń teńge berildi
AQTÓBE. QazAqparat - Aqtóbeniń Mahambetovka aýylynda turatyn Qyrqynbaevtar áýleti qazir týma-týystyń, tanystarynyń úıin jaǵalap júr. Úıdiń úlkenderi syz basqan baspanalaryna qaıta oraldy.
Qalalyq ákimdiktiń arnaıy shtaby 17 adamnan turatyn bútin bir áýletke bar bolǵany 30 myń teńge bóldi, dep habarlaıdy QazAqparat tilshisi.
Aqtóbe qalasyndaǵy sý tasqynynan soń halyq alǵashynda mektepterdi panalap, keıin ýaqytsha beketterden bir kúnde shyǵaryldy. Ákimdik «Qolǵanat Aqtóbe» qorynan 3,3 mıllıon teńgeni alyp, 110 otbasyǵa 30 myń teńgeden bólip berdi. Árqaısysy arnaıy qolhat qaldyryp, qarjyny alǵanyn rastaǵan. Olardyń arasynda 17 adamnan, 5 otbasydan turatyn Qyrqynbaevtar áýleti bar. «Altyn alqa» ıegeri Gúlısa Qyrqynbaeva Mahambetovka aýylynda bes ulymen birge turady. Tórteýi úılengen, balaly-shaǵaly. Kenjesi stýdent. Jalǵyzbasty ana 7 bala tárbıelep, eki qyzdy uzatqan. Ózgesi janynda. Qazir bir aýla ishindegi úsh balanyń panasy bolǵan úlken úı qulaǵaly tur. Ózi panalaǵan shaǵyn saraıdyń shańyraǵy qırap qaldy. Al ótken jyly ǵana asarlatyp salǵan úıdiń ishi syz, yzǵar.
«Men №28 orta mektepte jumys isteımin. Jalǵyzbasty ana sanatymen páter kezeginde 1008 bolyp turmyn. Qazir balalarym, nemerelerim ár jaqta jan baǵyp júr. Ózim panalaıtyn jerim bolmaǵan soń syz basqan úıge keldim, turyp jatyrmyn. Úıge kishkentaılar kelse sol kúni aýyryp, jótele bastaıdy. Al bir áýletke bólingeni 30 myń teńge. Páter jaldaýǵa berilgen aqsha kimge jetedi? Balalarym jumyssyz. Kimnen kómek bolatynyn da bilmeı otyrmyz»,- dedi Gúlısa Qyrqynbaeva.
Qyrqynbaevtar áýleti №26, 40 orta mektepke qonystanǵan kezde Muratbek Qyrqynbaevtyń 7 aılyq qyzy Janerke juqpaly aýrýlar aýrýhanasyna jatyp em aldy. Eki apta boıy emdelgen bala úıine oralyp, birneshe saǵattan soń qaıtadan aýrýhanaǵa tústi. Balanyń qyzýy kóterilip, jóteli kúsheıdi. Jedel járdem ony qaıtadan juqpaly aýrýlarǵa arnalǵan aýrýhanaǵa alyp ketti.
«Balanyń tamaǵy aýyryp tur. Ol túnde dem ala almaı qalýy múmkin. Sondyqtan aýrýhanaǵa jatqyzý qajet. Yzǵaldy, yzǵarly, syzdy jerde dert údeı túsedi. Men 37 jyldan beri jedel járdem beketinde jumys isteımin. 1978 jyly qala ishi sýǵa ketti. Al sáýirdegi sý tasqyny kezinde biz úzdiksiz, demalyssyz jumys istedik. Adamdardyń júıkesi tozyp, balalar túrli dertke shaldyqty. Sol kúngi qarbalas áli esimnen ketpeıdi»,- dedi dáriger Ǵabıt Muhambetjanuly.
Qyrqynbaevtar áýletiniń bes uly salǵan úıdiń bári bir adamǵa tıesili. Qujatta ıesi bir adam. Ózgesi tirkeýde turǵanymen, múlikke talasy joq.
«Ótken jyly nesıe alyp, úı salyp, bıyl qujat rásimdeýimiz kerek edi. Biraq sý tasqynynan soń bári qırap qaldy. Úıdiń ishine kirý múmkin emes. Balam úshin alańdaımyn. Ol sý tasqyny bolǵan kúni aýyrdy, áli dertinen tolyq aıyǵa almaı júr. Qaıda baramyz? Biz endi kimnen pana suraımyz? Ózimniń týǵanym joq. Al jaqyndarym bir kúnnen soń bizdi syıǵyzbaıdy»,- deıdi Gúlnazym Joldasova.
Qalalyq ákimdik bul áýletke 30 myń teńge berdi. Páterin jalǵa bergenderdiń kóńil-kúıine eleńdep otyrǵan otbasy ázirge 17 adamnyń jeteýi ǵana bir jerden pana tapqanyn aıtyp otyr. Ózgeleri týystaryn jaǵalap júr.
«Shý kóterip, bar ekenińdi aıtpasań, eshkim qaramaıdy, elemeıdi. Biz bir aýla ishinde turamyz. Qujat boıynsha múlkimiz joq, biraq resmı osy úıde tirkelgenbiz. Qazir turyp jatqan úıimiz qulap qaldy. Qalpyna keltirý múmkin emes. Endi qaıda baramyz? Eki balam bar. Kúıeýim jumys taba almaı, sandalyp júr. Ózim 45 myń teńge jalaqy alamyn. Aldaǵy kúnimiz bulyńǵyr. Endi kim anyǵyn aıtady? Bári tek úı ıesine deıdi. Sol úıde panalap otyrǵan baýyrlaryn kim oılaıdy?»,- deıdi áýlettiń kelini Saıa Álmuhan.
Aıta keteıik , Aqtóbe qalasyndaǵy sý tasqynynan zardap shekkender ýaqytsha panalaǵan mektepterden ana-analardyń aryzynan, oblysty tutynýshylardyń quqyqtaryn qorǵaý departamentiniń sanıtarlyq tazalyq týraly sheshiminen soń shyǵaryldy.Aldyn ala belgili bolǵany, qalada 77 úı qırap qaldy.
