Aqtóbedegi sý tasqyny kezinde zardap shekkenderdiń balalary jazǵy lagerge jiberiledi
AQTÓBE. QazAqparat - Aqtóbe qalasy boıynsha bıyl 61 myń oqýshy jazǵy lagerde tynyǵady. Olardyń arasynda kóktemgi sý tasqyny kezinde zardap shekken otbasylardyń 90 balasy bar, dep habarlaıdy QazAqparat tilshisi.
Aqtóbe qalasynda balalar men jasóspirimder jazǵy lagerlerde tynyǵa bastady. Úsh aı demalysta barlyǵy 61 myńnan astam bala jazǵy lagerlerde ýaqytty tıimdi ótkize alady. Qala mektepteri janynan ashylǵan lagerlerde 2 myńnan astam bala bıýdjet esebinen tynyqsa, ata-analar esebinen 1900 bala úsh aýysymda demalady. Al ata-ananyń qamqorlyǵynsyz qalǵan, kópbalaly, tolyq emes, az qamtylǵan otbasy balalary memleket qarjysy esebinen qala syrtyndaǵy jazǵy lagerlerde tynyǵady. Olardyń arasynda kóktemgi sý tasqyny kezinde baspanasy zardap shekken otbasy balalary da bar.
«Kóktemgi sý tasqyny kezinde zardap shekken otbasylardyń 7-14 jastaǵy balalary esepke alyndy. Jergilikti bıýdjet esebinen jazǵy demalysty ótkizý úshin 90 bala lagerlerge jiberiledi. Onyń ishinde 59 bala mektep janyndaǵy, 31 bala qala syrtyndaǵy lagerlerge barady»,- dedi qalalyq ǵylymı-ádistemelik ortalyq dırektorynyń orynbasary Jańylsyn Nurǵalıeva.
Aıta keteıik, jospar boıynsha 17 myńǵa jýyq bala mektepte eńbek tájirıbesinen ótip, 10 myńnan astam oqýshy mektep aýlasyndaǵy sport alańdaryna bara alady. Aqtóbe qalalyq ǵylymı-ádistemelik ortalyǵynyń esebi boıynsha bıyl 9400-den astam bala ata-anasymen birge demalmaq. Olardyń arasynda shetel asyp, teńiz jaǵasynda tynyǵatyndar da bar. Aldyn ala esep boıynsha balalar men jasóspirimderdi jazǵy saýyqtyrý jáne demalys ornymen qamtý óńirde 99,3 paıyzdy quraýy tıis. Til úırenemin degenderge 10 bilim ordasynda qosymsha aqyly kýrstar ashylady.
