Aqtóbedegi sý tasqyny kezinde zardap shekkender qysqa daıyn ba?

Aqtóbedegi sý tasqyny kezinde Qısyqkól baý-baqsha ujymynda turatyndar bir túnde úılerin tastap ketken bolatyn. Bári sý astynda qaldy. Turmystyq tehnıka, kıim-keshek pen azyq-túlik jaramsyz kúıge tústi. Baspanasy qıraǵandar jer alyp, úı salyp jatyr. Al úıi sol kúı saqtalǵandar mamyr aıynda qaıta oralyp, jaz boıy dalada turǵan. Kún salqyndap, kúz kelgende olar ylǵaldyń keppegenin aıtyp shaǵymdanyp otyr. Kóbi zeınetkerler, kópbalaly otbasylar.

«Úıimiz sý astynda qalǵan kezde mektepke baryp, keıin páter jaldap turǵan edik. 22 mamyr kúni úıge kelip, turmystyq tehnıka, tósenishti dalaǵa shyǵaryp qoıdyq. Esik, terezeni ashyp, keptirildi. 1 shilde kúni eden taqtaıshalaryn qaıta tósep, daıyndyq júrdi. Qabyrǵalardy qaıta árledi. Kún jyly, tipti ystyq. Sonda da biz úıge ot jaǵyp otyrmyz. Sebebi, syz bar, balalarymyz kúnde aýyrady»,- dedi Saodathan Myrzabaeva.

Bul otbasy sý tasqynynan soń «Qolqanat Aqtóbe» qorynan 300 myń teńge kómek aldy. Qarjyǵa jóndeý jumystaryn júrgizip, peshti qaıta saldy. Biraq kóktemgi sýdyń yzǵary qaıta shyqty.

«2 jastaǵy qyzym besikke jatady. Al ózgesi jerde uıyqtaıdy. Tańerteń turǵan kezde denemiz ylǵaldanyp, tósek ornymyz ıistenip ketkenin bilemiz. Úıge kirip, tynys alý múmkin emes. Qalalyq ákimdik qarjy berdi, biz jóndeý jumystarynan soń bári jaqsy bolady dep josparlaǵan edik. Biraq úmitimiz aqtalmady, úıimizde turý múmkin emes. Páter jaldap turýǵa 60 myń teńge jalaqy jetpeıdi»,- dedi Saodathan Myrzabaeva.

Al Kúlánda Myrzabaeva sý tasqyny kezinde tek qujattaryn alyp, dalaǵa shyqty. Turmystyq tehnıka men tósenishin, kıimderin, tósegin jınap, saqtap qala almady. Nesıege alǵan teledıdary isten shyqqan, al tońazytqysh birneshe aıdan soń qaıta iske qosyldy. Bul otbasy ákimdikke kómek surap baryp, 100 myń teńge aldy.

«Sáýirde úıimiz sýǵa ketip, páter jaldaýymyzǵa týra keldi. Keıin ákimdikten kómek surap, olar 100 myń teńge berdi. Aı saıyn 30 myń teńge tólep, ózgesi azyq-túlikke jumsaldy. Jaz boıy aýlaǵa kúrke quryp, jan saqtadyq. Qazir kúz keldi, kún men tún salqyn. Biz ot jaǵamyz, biraq peshimizdi áli salmadyq. Sebebi, aqshamyz joq. Qalalyq ákimdik bir rettik kómekten soń qordan qarjy bólinbeıtinin basa aıtty. Olar aqsha bermese qysta úsip ketemiz. Kimnen kómek suraımyn, ony da bilmeı otyrmyn. Buryn ákimdik qyzmetkerlerin tanymaıtyn edik, endi báriniń qaıda júretinin, qandaı kabınette otyratynyn jattap aldyq. Biraq odan esh paıda bolmaı tur»,- dedi Kúlánda Myrzabaeva.

Bul otbasyna aýylǵa kóshýge usynys jasalǵan. Biraq zeınet jasyna jaqyndaǵanda sıyr saýyp eden jýýǵa múmkindigimiz, densaýlyǵymyz saı kelmeıdi dep usynysty qabyldamady.

Aıta keteıik, kóktemgi sý tasqyny kezinde kásipker qyz-kelinshekter «Qolǵanat Aqtóbe» qoryn quryp, qarjy jınady. Іri munaı kompanııalary men ekinshi deńgeıli bankter, qaladaǵy qurylys kompanııalary qarjy bólip, aýdandar jaǵdaıy tómen otbasylarǵa páter alyp berdi. Degenmen sý tasqyny kezinde zardap shekken otbasylar berilgen kómektiń jan-jaqty qamtylmaǵanyn aıtyp, qysqa múlde daıyndalmaǵanyn kórsetti.

«Árbir otbasy jeke qaraldy. 40-400 myń teńge aralyǵynda aqshalaı kómek alǵan adamdardyń qujatyna qarap, qarjy bólindi. «Qolǵanat Aqtóbe» qory adamǵa birneshe jyl boıy kómek kórsetip otyra almaıdy. Ár adam ózi tirshilik jasaýy kerek. Sonymen qatar, qalalyq jumyspen qamtý jáne áleýmettik baǵdarlamalar bóliminen 100-den astam otbasyǵa 70 myń teńge kómek berildi. Bul jumys ári qaraı jalǵasady. Bir aıta keterligi, qor bir ret aqsha beredi, qaıta kómek kórsetpeıdi»,- dedi Aqtóbe qalasy ákiminiń orynbasary Lázzat Orazbaeva.