Aqtóbedegi sý tasqyny kezinde adamdarǵa kómektesken kompanııalar marapattaldy
Aqtóbedegi sý tasqyny kezinde «Qolǵanat Aqtóbe» qoryna «Mańǵystaýmunaýgaz» AQ 53 mıllıon teńge, «SNPS-Aqtóbemunaıgaz» AQ 50 mıllıon teńge, ekinshi deńgeıli bank 10 mıllıon teńge, «Vostok neft» JShS 7 mıllıon teńge jáne «Qazahoıl Aqtóbe» JShS 5 mıllıon teńge qarjy aýdardy. Sonymen qatar, memlekettik organdarda, bıýdjettik mekemelerde jumys isteıdin muǵalimder men dárigerler, joǵary, orta arnaýly oqý oryndarynyń ujymdary bir kúndik jalaqylaryn berdi. Jastar qurylys kezinde kómektesti.
«Qor 6 aı ishinde 185 mıllıon teńgeni bólip, kómek kórsetti. Qýraıly, Sazdy, Blagodar aýyldyq okrýgterinde úı salyp jatqan adamdarǵa qurylys materıaldary jetkizilip, jylý qazandyqtary satyp alyndy. Qazir sý tasqyny kezinde zardap shekkenderge 107 úı salynyp jatyr. Olarǵa gaz, sý, jaryq tegin jetkizildi. Sonymen qatar, Aqtóbe oblysyndaǵy ár aýdan áleýmettik jaǵdaıy tómen, muqtaj otbasylardy pátermen qamtamasyz etip, turmystyq tehnıka syılady»,- dedi Qazaqstandaǵy isker áıelder qaýymdastyǵynyń Aqtóbe oblysy boıynsha tóraǵasynyń orynbasary Irına Svıtıch.
Qor sý tasqyny kezinde zardap shekken adamdarmen qatar áleýmettik jaǵdaıy tómen otbasyǵa kómektesti. Tipti úıi órtenip ketken Batyr Toqmambetovke qor arqyly qaıyrymdy adamdar kómek berdi.
«Órt kezinde zardap shekken otbasy týraly qor arqyly bilip, oqıǵa ornyna barǵan edik. Sol jerde qajetti qurylys materıaldarynyń tizimi jasalyp, satyp aldym. Sonymen qatar, habar estigen adamdar kelip, kómek kórsetti. Úıine bardyq, qurylys jumysy aıaqtalǵan. Qysta olar jyly jerde turady»,- Aqtóbe qalasynyń turǵyny Anýar Amanǵalı.
Aıta keteıik, kóktemgi sý tasqyny kezinde baspanasy sý astynda qalǵan adamdarǵa jergilikti bıýdjetten 37 mıllıon teńge bólindi. Olardyń arasynda 300 myń teńgeden 3 mıllıon teńgege deıin aqsha alǵan adamdar bar.
«Kez kelgen adamǵa eki joly usynyldy. Olar qordan aqsha alady nemese baǵalaýshylardyń sheshimin kútip, memlekettik kómek alady. Sol kezde zardap shekkenderdiń kóbi qordan aqsha aldy»,- dedi Aqtóbe qalasy ákiminiń orynbasary Rýzııa Aıdasheva.