Aqtóbedegi sý tasqyny: 64 januıa jańa baspana salyp aldy
AQTÓBE. QazAqparat - Aqtóbede kóktemgi sý tasqyny kezinde úısiz qalǵan adamdardyń bir bóligi jańa baspanalaryna qonystandy. Óńir basshysy Berdibek Saparbaev olardy masyl bolmaı, jumys isteýge shaqyrdy, dep habarlaıdy QazAqparat tilshisi.
Aqtóbe qalasyndaǵy Qýraıly aýylynan jer telimin alǵan 81 otbasynyń 64-i qurylys jumystaryn aıaqtap, jańa úılerine qonystandy. Ózgesi aǵaıyn-týystarynyń úıin, ýaqytsha baspanany panalap otyr. Jer telimi berilip, qurylys jumystary aıaqtalǵan soń, kommýnaldyq kásiporyndar gaz, sý, elektr toǵyn tegin tartyp berdi. Al jumyssyz adamdardyń bir bóligi aýyl mańynaǵy jylyjaıǵa jumysqa ornalasty.
«Men kópbalaly anamyn. Úıimiz qulap, 8 jan jaz boıy qurylys basynda júrdik. Jer telimin alyp, qarjylaı kómek berilgen soń, eki qabatty úı salyp aldym. Ózim jylyjaıda jumys isteımin. Eńbekaqymyz - 55 myń teńge», - dedi Qýraıly aýylynyń turǵyny Janna Abdıeva.
Aýyl mańyndaǵy jylyjaıda barlyǵy 34 adam jumys isteıdi. Áli 17 adamǵa jumys kerek.
«Qysta jer alyp, kóktemde egin egýge kirisý kerek. Sonymen qatar, memlekettik baǵdarlamalarmen mal alyp baǵýǵa bolady. Jaıylym bar. Eshkim masyl bolmaýy kerek. Balalardy da sharýashylyqqa úıretken durys», - dedi Aqtóbe oblysynyń ákimi Berdibek Saparbaev.
Keıin aımaq basshysy qurylys jumystary kezinde gaz, sý, jaryq jelisin jetkizgen kompanııalarǵa alǵys aıtty.
Aıta keteıik, kóktemgi sý tasqyny kezinde Aqtóbede 100-den astam úı qırap, kádege aspaı qalǵan bolatyn. Sol kezde qurylǵan «Qolqanat Aqtóbe» qoryna 253 mıllıon teńge jınaldy. Jer telimi berilgen adamdarǵa 1 mıllıon teńgege qurylys materıaldary jetkizildi. 
