Aqtóbedegi sot saraptama ortalyǵynyń qyzmetkerleri basshynyń jumystan ketýin talap etti
AQTÓBE. QazAqparat - Aqtóbede sot-medıtsınalyq saraptama ortalyǵynyń qyzmetkerleri basshynyń jumystan ketýin talap etti. Ádilet mınıstrine 50-den astam qyzmetker ashyq hat jazǵan, dep habarlaıdy QazAqparat tilshisi.
Aqtóbedegi sot-medıtsınalyq saraptama ortalyǵyna 18 naýryz kúni jańa dırektor taǵaıyndaldy. 36 jastaǵy Dáýren Aımaqov arada bir aı ótkende barlyq qyzmetkerlerimen shekisip, ashyq hat Ádilet mınıstrligine jetti.
«Jańa basshy kelgen soń árqaısysymyzǵa tıise bastady. Tipti, sotqa berip, shaǵym túsiretin bolsań, jumystan shyǵarý úshin 10 sebep tabamyn dep qorqytty. Las sózder aıtyp, balaǵattady»,- dedi sot medıtsınalyq ortalyǵynyń bólim meńgerýshisi Qaırat Baıbosynov. Elimizde bıyl sot medıtsınalyq ortalyq pen sot saraptamalyq ınstıtýty biriktirilgen bolatyn. Eki mekemeniń jańa basshysy Aqtóbege kelip, jumysyn bastaǵan kúni-aq qyzmetkerlerine aýyr sózder aıtyp, ózin tanymaǵandardan jaýap alǵan. Tipti, «men kele jatqanda oryndaryńnan turyńdar» dep eskertý aıtqan.
«Men negizgi jumysymdy ysyryp qoıyp, dırektordyń hatshysy bolyp júrmin. Jınalystarda hattama toltyryp otyramyn. Ár qadamymyz ańdýly, sanaýly. Máselen, laborant, tehnıkalyq jumysshylardan qansha probırka, qansha metr eden jýǵanyn suraıdy»,- dedi sot medıtsınalyq sarapshy-bıolog Janna Satqulova. Qyzmetkerler jańa basshynyń tosyn minezine úırene almady. Olar júıke tynyshtandyryp, sabyrlylyqqa shaqyratyn dári-dármekti qaltaǵa salyp, kez kelgen sátte bir-birine kómek kórsetýge daıyn otyr.
«Volıdol, valerıanka qaltamyzda júredi. Júıkemiz syr berip júr. «Máıithanaǵa jańa ǵımarat turǵyzylady, soǵan árqaısyń maǵan 20 mınýt ishinde máıithananyń úlgisin syzyp ákep berińder» dedi. Meniń mamandyǵym bıolog, sáýletshi emespin. Basshy talap etken soń óz oıymmen syzyp, aparyp berdim»,- deıdi sot medıtsınalyq ortalyǵynyń bólim meńgerýshisi Irına Tkachenko.
Aıta keteıik, sot-medıtsınalyq ortalyq qyzmetkerleri jańa basshy Dáýren Aımaqovtyń 2007 jyly Qylmystyq kodekstiń «Bılik nemese qyzmettik ókilettigin asyra paıdalaný» baby boıynsha eki jyl merzimge sottaǵanyn anyqtady. Osy derekten soń qyzmetkerlerdiń bári birigip, Aımaqovtan jumystan ketýin talap etip otyr. Al sot saraptama ortalyǵynyń dırektory Dáýren Aımaqov ózine taǵylǵan aıyptaýlarmen múlde kelispeıdi. Tipti, «buryn sottalǵan» degen aıypqa jiti daıyndalyp, 2008 jyly alǵan anyqtamasyn kórsetti.
«Sottalyp, sottalmaǵandyǵym týraly aqparat jeke basyma qatysty derek bolǵan soń ashyq aıtpaımyn. Meniń qolymda qujatym bar. Qazir ortalyqtaǵy qyzmetkerlerdiń shaǵymy boıynsha qyzmettik tekserý jumysy bastaldy. Astanadan komıssııa keldi. Ádilet mınıstrligi tekserý nátıjesi boıynsha sheshim shyǵaratyn bolady»,- dedi Dáýren Aımaqov.
