Aqtóbedegi saýda ortalyǵynda vaktsına egý pýnkti ashyldy
AQTÓBE. QazAqparat – Aqtóbedegi «Kerýen city» saýda, oıyn-saýyq ortalyǵynda vaktsına egý pýnkti ashyldy, dep habarlaıdy QazAqparat tilshisi.
Búgin mobıldi jyljymaly top saýda úıinde óz jumysyn bastady. Bul — óńirdegi saýda úıinde ashylǵan alǵashqy vaktsınalaý pýnkti.
«Vaktsınalaý pýnkti saǵat 10:00-18:00 aralyǵynda jumys isteıdi. Munda №3 qalalyq emhana qyzmetkerleri jumyldyrylǵan. Pýnktke barlyq medıtsınalyq jabdyq jetkizildi. Vaktsına qabyldamas buryn adamdar arnaıy tekserýden ótedi. Terapevttiń baqylaýynan soń ekpe beriledi. Talap bárine ortaq. Jasy 18-den asqan kez kelgen turǵyn ımmýndaýǵa qatysady», - dep habarlady oblystyq densaýlyq saqtaý basqarmasynyń baspasóz qyzmeti.
Eske salsaq, aqtóbelik munaıshylar Saýd Arabııasynda óndirilgen qytaılyq «Sınofarm» vaktsınasyn qabyldaıdy. 30 sáýir kúni óńirde eki komponentti 22 myń doza jetkiziledi.
