Aqtóbedegi retro ánder festıvalinde jergilikti bılik pen polıtsııa kelisimge kele almady
AQTÓBE. QazAqparat - Aqtóbede Shámshi Qaldaıaqovtyń týǵan kúnine arnalǵan «Án ǵumyr» retro ánder festıvali ótip jatyr. Erke men Tóreǵalıdiń kontsertinen soń polıtsııa qyzmetkerleri men uıymdastyrýshylar bir mámilege kele almady, dep habarlaıdy QazAqparat tilshisi.
Aqtóbede retro ánder festıvali ótip jatyr. Birer apta boıy daıyndyq júrgizgen Ǵazıza Jubanova atyndaǵy Aqtóbe oblystyq fılarmonııasynyń ujymy bul án keshin kórermenmen tyǵyz baılanysta ótkizýdi josparlaǵan eken. Kórermen án tyńdaıdy, tipti ortadaǵy alańǵa shyǵyp, bıleı alady. Biraq Erke men Tóreǵalıdiń kontsertindegi jaısyz oqıǵadan soń jergilikti polıtsııa qyzmeti tártipti kúsheıtip, eki qatardan turatyn qorshaýmen sahnany bekitip tastady.
«Retro ánder festıvaline jasy úlken adamdar keledi dep 800 oryndyq qoıyldy. Eski, esti ánderdi tyńdap, birge shyrqaıyq degen maqsatpen uıymdastyrylǵan kesh edi. El Ánuranynyń avtory, kompozıtor Shámshi Qaldaıaqovtyń týǵan kúnine tuspa-tus uıymdastyryp, aqtóbelikterge tamasha kóńil-kúı syılaǵymyz keldi. Astana fılarmonııasynan úsh ánshi, Almatydan Mıras-Quralaı Bekjanovtar, Jadyra Arystanova, Aıgúl Elshibaeva keldi. Bári shaqyrýdy qabyldap, birden kelisim berdi. Jergilikti «Tamsan» toby, Er-Júnis toby bar. Repertýar arnaıy tańdalyp, stsenarıı jazyldy. Osyndaı keshte qoıylǵan qorshaý kedergi keltirip tur»,- dedi Aqtóbe oblystyq fılarmonııa dırektory Elýbaı Kenjalıev.
Retro ánder festıvaline Shámshi Qaldaıaqovty kórgen aǵa býyn ókilderi de keldi.
«Ózim Almatyda oqyp, Shámshi Qaldaıaqovty kórgen adammyn. Stýdent kezimizde olar bizdiń janymyzdan tabylatyn. Keshterge qatysty, onyń áńgimelerin estidim. Retro ánder festıvali bolǵan soń jas kezimizdi eske túsirý úshin keldik»,- dedi aqtóbelik turǵyn Baıuzaq Mahmýtov.
Aıta keteıik, sahna aldyndaǵy eki qatarly qorshaýdy alyp tastaý týraly kelisim Aqtóbe oblysy ákiminiń orynbasary Erbol Nurǵalıev pen oblystyq jergilikti polıtsııa qyzmetiniń bastyǵy Qanybek Jaqsyǵalıevtiń arasynda júrdi. Arada 1 saǵat ótkende eki qorshaý da alynyp, keıin polıtsııa qyzmetkerleri bılikpen aradaǵy kelisimge shúbá keltirip, sarbazdardy sahna aldyna kúzetke qoıdy. Eske salsaq, Qurylysshylar kúni Erke men Tóraǵalı Aqtóbedegi saıabaqta án aıtyp, kórermen sahnaǵa shyǵyp ketken bolatyn.
