Aqtóbedegi raqymshylyq aıasynda 6 adam bostandyqqa shyqty
AQTÓBE. QazAqparat - Búgin Aqtóbedegi KA 168/2 túzetý mekemesinen 6 adam bostandyqqa shyqty. Olardyń úsheýine bas bostandyǵynan shekteý jazasy kesilip, úsheýi aıyppul tóledi, dep habarlaıdy «QazAqparat» tilshisi.
«Aqtóbe oblysy boıynsha QAJ departamenti, KA 168/2 túzetý mekemesinde el táýelsizdiginiń 25 jyldyǵyna baılanysty sottalǵandarǵa raqymshylyq jasaldy. Barlyǵy 288 adam bostandyqqa shyǵarylady. Onyń ishinde altaýy aýyr emes qylmys jasaǵan. Qazirgi kúni tórteýi bostandyqta júr. Orta aýyr qylmys jasaǵandardyń 48-i de raqymshylyqqa ilikti. Olardyń 17-i bas bostandyǵynan shekteý jazasymen shyǵady, ekeýi aıyppul tóledi. Memleket paıdasyna 1 mıllıon 400 myń teńge óndirildi»,- dedi KA 168/2 túzetý mekemesi tárbıe bóliminiń bastyǵy Baǵdat Ismaılov.
Raqymshylyq zańy boıynsha aýyr qylmys jasaǵan sottalýshylardyń ótelmegen merzimi shegerilip jatyr. Al búgin ortasha aýyr qylmys jasaǵan 6 adam bostandyqqa shyqty. Qylmyskerdiń úsheýi bas bostandyǵynan shekteý jazasymen erkindikke jiberilip, úsheýi aıyppul tóledi.
«Balalarmen tóbelesip, 3 jylǵa bas bostandyǵymnan aıyryldym. «Buzaqylyq» baby boıynsha isti bolyp, 8 jyl boıy túrmede otyrdym. Raqymshylyqqa iligetinimdi jańa jyldyń aldynda bilip, osy kúndi asyǵa kúttim. Búgin qýanyshty kún. Otbasymmen, balalarymmen qaýyshamyn. Biz sekildi adasqandardyń túzý jolǵa túsip, jaqsy azamat bolýyna septigin tıgizgen Elbasy Nursultan Nazarbaevqa alǵys aıtamyz. Raqymshylyq zańy biz úshin ekinshi múmkindik syılady»,- dedi sottalýshy Nurdáýlet Japaqov.
Eske salsaq, Aqtóbe oblystyq jumyspen qamtý jáne áleýmettik baǵdarlamalar basqarmasy raqymshylyqqa ilikken azamattardy jumysqa ornalastyrýǵa kiristi. Olar úshin qazir 200-den astam jumys orny usynylyp otyr. Ortasha jalaqy 50 myń teńge. Ázirge bostandyqqa shyqqandardyń birde-biri jumys izdep, jumyspen qamtý ortalyǵyna barmaǵan.
Altynaı Saǵyndyqova
