Aqtóbedegi Probatsııa úıi qaıtalanatyn qylmys sanyn eki ese azaıtty
AQTÓBE. QazAqparat - Aqtóbede quqyq qorǵaýshylardyń tirkeýinde turǵan adamdar Probatsııa úıi arqyly jumysqa ornalasty. Olar psıhologııalyq testten ótkizilip, qujattary túgeldendi, dep habarlaıdy QazAqparat tilshisi.
Aqtóbedegi «Probatsııa úıiniń» jumysy óz nátıjesin bere bastady. Ortalyq buryn isti bolyp, jazasyn ótep shyqqandardyń qaıta qylmys jasamaýy úshin olardy qoǵamǵa beıimdep, kómektesý, quqyqtyq, psıhologııalyq kómek berý maqsatynda ashylǵan bolatyn. Munda bilim berý, jumyspen qamtý, kásipkerlikti damytý baǵytyndaǵy memlekettik mekemeler men prokýratýra, ádilet departamentiniń mamandary «bir tereze» qaǵıdasy boıynsha jumys istedi. Jobanyń birinshi kezeńi aıaqtalyp, qylmystyń qaıtalaný deregi eki esege azaıǵany anyqtaldy. 
Aqtóbe oblystyq prokýratýrasynyń basqarma basshysy Jasulan Bralınniń aıtýynsha, 100-den astam adamǵa medıtsınalyq kómek kórsetilip, 354 adam psıhologııalyq testten ótti. Al arnaıy tirkeýde turǵan 83 adam turaqty jumysqa ornalasty. Qoǵamdyq, áleýmettik jumysqa kiriskender de bar. Arnaıy bilim almaǵan 29 adam kásibı qaıta daıarlaýdan ótip, qujattaryn joǵaltyp alǵandarǵa kómek kórsetildi.
«Baspanasy joq adamdar arnaıy beıimdeý ortalyqtaryna qonystandy. «Bıznes-bastaý» baǵdarlamasy boıynsha 4 adam oqytylyp, 5 adam jergilikti atqarý organdarynan birjolǵy kómek aldy. Bas prokýratýra jobany oń baǵalap, ózge óńirlerge úlgi etti. Óńirde «Probatsııa Úıi» baǵdarlamasyn iske asyrýdyń ekinshi kezeńi ázirlendi. Endi jańadan esepke alynǵandarǵa kómek kórsetiledi. Sondaı-aq buryn esepke alynǵandardyń máselesi turǵylyqty ornynda sheshiletin bolady»,- dedi J.Bralın.
