Aqtóbedegi perzenthanada jas ana kóz jumdy
AQTÓBE. QazAqparat – Aqtóbe oblystyq perınataldyq ortalyqta 30 jastaǵy Aımıra Atshybaeva kóz jumdy, dep habarlaıdy QazAqparat tilshisi.
Aqtóbe oblystyq perınataldyq ortalyqqa búgin kóz jumǵan Aımıra Atshybaevanyń týǵan-týystary kelip, qaıǵyly oqıǵanyń sebebin surady.
«Kelinshegim 17-mamyr kúni kóz jumdy. Dárigerler «ókpesinde kinárat bar» dep aıtty. Biraq áıelinm kúni búginge deıin densaýlyǵyna shaǵymdanyp, ókpesi aýyratynyn aıtpady. Júktiligi jaqsy ótti. Osy jaǵdaı boıynsha durys sheshim qabyldaǵanyn qalaımyn. Meniń maqsatym túrmege otyrǵyzyp, bas bostandyǵynan aıyrý emes. Maman qatesi úshin jaýap bersin», - dedi Altynbek Jumaǵazıev.
Týma-týysynyń kóp suraǵyn dárigerler perzenthana syrtyna shyǵyp tyńdady.
«Aldymen tolǵaq shaqyratyn dári bergen. Keıin onyń palatada bosanǵanyn bildik. Es-túsin bilgen. Balasyn baýyryna basty. Sodan keıin qan toqtamaı, onyń jansaqtaý bólimine jetkizilgenin bilip otyrmyz. Kóp uzamaı kóz jumdy», - dedi marqumnyń jeńgesi Gúldan Aqmambetova.
Qaıǵydan qan jutqan týǵan-týys talap etken kezde ǵana bas dáriger kóńil aıtty.
«Qazir arnaıy komıssııa quryldy. Tekserý qorytyndysynan soń shara qoldanylady», - dedi oblystyq perınataldyq ortalyqtyń bas dárigeri Ashat Balyqov.
Aıta keteıik, qazir bala ákesine berildi. Salmaǵy - 4,5 keli.
«Jas ana sý ketip, bizge tústi. Bir táýlik boıy baqylaý júrgizildi. Keıin úsh dáriger qarap shyqtyq. Bala oń kelgen. Salmaǵy da iri bolady dep oılamadyq. Óz betimen bosanady dep sheshim qabyldandy. Shynynda da sábıin ózi ómirge ákeldi», - dedi bosaný bóliminiń meńgerýshisi Alekseı Hasanov.
