Aqtóbedegi ótken jylǵy lańkestik oqıǵadan keıin kúzet kúsheıtildi - Muhametqalı Satov
Ótken jyldaǵy lańkestik shabýyldan soń Aqtóbegi № 6655 áskerı bóliminde kúzet kúsheıip, sarbazdar men ofıtserlerdiń daıyndyǵy jandandy. Aqtóbedegi eske alý, erlikke qurmet kórsetý sharasyna kelgen QR Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary Muhametqalı Satov lańkester qaqpany avtobýspen buzyp ótip, shabýyl jasaǵan kezde barlyǵy erejege saı qarsylyq kórsetkenin aıtty.
«Ulttyq ulannyń jeke quramy tótenshe shabýylǵa daıyn boldy. Aıta ketsek, 5 maýsym kúni 17 lańkes áskerı bólim terrıtorııasyna kirgen kezde áskerı qyzmetkerler ereje boıynsha olarǵa toıtarys berdi. Aldymen kezekshi bólim jumys isteýi kerek. Tekserý-ótkizý beketi terrorshylarǵa qarsy oq atyp, sol jerde serjant Berik Qalıev qaza boldy. Qaraýyldyń jeke quramyndaǵy úsh adam lańkesterge qarsy oq atty. Qarý-jaraq qoımasyn basyp alý maqsatyn kózdegen lańkester óz maqsattaryna jete almady. Qoımany saqtaý jolynda jaýyngerler men áskerı qyzmetkerge qarýly qarsylyq kórsetti. Osydan soń terrorıstik shabýylǵa daıyn bolmady dep aıtý durys emes»,- dedi M. Satov.
№ 6655 áskerı bólimindegi qaýipsizdik sharalaryn kúsheıtý jumysy ári qaraı jalǵasyp jatyr. Bólimniń aldyńǵa qaqpasy aýystyrylyp, qorshaýlardy bıiktetý jumysy bastaldy. Baqylaý munaralary da jańartyldy. Áskerı bólim aýmaǵyndaǵy beınebaqylaý kameralarynyń sany artyp, «Tıgr» atty áskerı tehnıka satyp alynǵan.
«Elimiz boıynsha ár áskerı bólimde Áskerı kúzet qyzmeti paıda bolady. Kúzet basshysy jeke quramnyń tótenshe shabýylǵa, tosyn jaǵdaıǵa daıyndyǵyna jaýap beredi. Іshki qaraýyl da kúsheıtildi. Ofıtserler men sarbazdardyń daıyndyǵyna mán berip, patrıottyq sharalar keshendi túrde iske asyrylyp jatyrmyz. Áskerı bólimderde qarý, oq-dári, áskerı tehnıkanyń bári bar. Ulttyq ulan Otandy, eldi qorǵaýa daıyn, buryn da daıyn boldyq»,- dedi QR Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary Muhametqalı Satov.
