Aqtóbedegi ósimdik maıyn shyǵaratyn zaýytta bir jumysshy qaza boldy
AQTÓBE. QazAqparat - Aqtóbedegi ósimdik maıyn shyǵaratyn zaýytta tótenshe jaǵdaı. Kúkirtti sýtekke ýlanǵan bir jumysshy qaza bolyp, bireýi aýrýhanaǵa tústi, dep habarlaıdy QazAqparat tilshisi.
Aqtóbe qalasynyń irgesinde ósimdik maıyn shyǵaratyn zaýytta keshe tótenshe jaǵdaı boldy. Oqıǵany oblystyq eńbek ınspektsııasy tirkep, qazir tekserý jumystaryn bastap ketti. Birneshe medıtsınalyq saraptama taǵaıyndaldy. 62 jastaǵy bas ınjenerdiń ólimine ákep soqtyrǵan oqıǵanyń sebebi dárigerlerdiń qorytyndysynan soń anyqtalýy tıis.
«Oqıǵa ornynda arnaıy komıssııa jumys istep jatyr. Basshylarmen, jumysshylarmen sóılesip, máseleni tekserýdemiz. Anyq-qanyǵy saraptamadan soń belgili bolady. Qorytyndy 10 kúnnen keıin shyǵarylady», - dedi oblystyq eńbek ınspektsııasy jónindegi basqarma basshysynyń orynbasary Baýyrjan Orazaev.
Oblystyq jedel járdem aýrýhanasynyń dárigerleri naýqaspen sóılesip, «Aqtóbe Fýds» kompanııasynyń zaýytyndaǵy mán-jaıdy anyqtap úlgerdi. Keshe jasy 40-qa jaqyndaǵan ınjener-ekolog zaýyt ishindegi jumysty baqylap júrip, arada 5 mınýt ótken soń esinen tanyp qalǵan. Sol sátte ony taǵy úsh jumysshy qutqarý úshin jan ushyra júgirip, ony syrtqa alyp shyqqan. Olar da ýlanǵan, biraq esterinen tanyp, qulamaǵan. Qazir bireýi aýrýhanada. Ózge úsheýi jaǵdaıymyz jaqsy dep aýrýhanaǵa jatýdan bas tartqan.
«Naýqastyń jaǵdaıy birqalypty. Jansaqtaý bóliminen palataǵa aýystyryldy»,- dedi oblystyq jádel járdem aýrýhanasy bas dárigeriniń emdeý isi jónindegi orynbasary Marat Janqulov.
Aýrýhanaǵa túsken naýqastyń sózine sensek, jumysshylar kúkirtti sýtekten ýlanǵan. Óndiris kezinde túzilgen qaldyq tazartylǵan soń káriz qubyryna tógilýi tıis bolǵan. Sol aralyqta qandaı da bir qatelik ketýi múmkin. Qazir osy derek boıynsha arnaıy mamandar jumys istep jatyr.
