Aqtóbedegi Ortalyq stadıonǵa jyljymaly medıtsınalyq keshen qoıyldy
AQTÓBE. QazAqparat – Aqtóbedegi ortalyq stadıon alańy men «Dına» gıpermarketiniń aldynda jyljymaly medıtsınalyq keshen qoıyldy. Onda vaktsına egý jumysy júrgizilip jatyr, dep habarlaıdy QazAqparat tilshisi.
Aqtóbe oblysy boıynsha barlyǵy 38 myńǵa jýyq adam vaktsınanyń birinshi komponentin qabyldady. Al 8 myńǵa jýyǵy eki komponentti de aldy.
«Jyljymaly keshen saǵat 9:00-20:00 aralyǵynda jumys isteıdi. Zamanaýı keshen ishinde qajetti qural-jabdyq bar. Munda bir maman adamnyń satýratsııasyn, ekinshisi qan qysymyn ólsheıdi. Al úshinshisi ekpe beredi. Keshen ishinde vaktsına qabyldaǵan adamnyń 30 mınýt boıy baqylaýda bolýyna jaǵdaı jasalǵan», - dedi №6 emhananyń bólim meńgerýshisi Almat Baıdýlaev.
Eske sala keteıik, dúısenbide Aqtóbedegi saýda – oıyn-saýyq ortalyǵynda alǵashqy vaktsınatsııalaý kesheni ashyldy.
Qazirgi kezde emdeý mekemelerinen tys 3 orynda ekpe qabyldaýǵa múmkindik bar. Aqtóbe oblysy boıynsha ázirge tek «Spýtnık V» vaktsınasy salynyp jatyr.
