Aqtóbedegi ortalyq meshit qyzmetkeri bas ımamdy sotqa berdi

AQTÓBE. QazAqparat - Aqtóbedegi «Nur Ǵasyr» meshiti janyndaǵy «Zeket» qorynyń zańdy ókili Dámen Ómirbek bas ımam Tólebı Ospandy sotqa berdi. Talapker qysymdy toqtatyp, jumys jasaýyna kedergi keltirmeýdi suraıdy, dep habarlaıdy QazAqparat tilshisi.

Dámen Ómirbek 2011 jyldan beri «Nur Ǵasyr» ortalyq meshitinde jumys istep keledi. 2015 jyly «Zeket» qorynyń zańdy ókili qyzmetine resmı kirisip, halyqtan jınalǵan qarjy men múliktiń 20 paıyzyn aılyq retinde aı saıyn alyp otyrýǵa kelisimshart jasady. Jumysynda esh qıyndyq pen kelispeýshilik bolmaǵan qyzmetker bar kederginiń bas ımam Tólebı Ospan kelgen soń bastalǵanyn málimdep, sotqa aryz túsirdi. Alǵashqy tyńdalym ótip, kelesi aptada №2 qalalyq sotynda otyrys bastalady.
 

«Tólebı Ospan alǵash kúni-aq «Sen maǵan unamaısyń. Aryz jazyp, óz erkińmen jumystan shyq. Astanadan naıb-ımamdar keledi. Solar kelgenshe ornyńdy bosat. Seniń ornyńa solardyń bireýin usynamyn nemese bul jumysty ózim atqaramyn», - dedi. Keıin óz erkimmen aryz jazyp ketsem, dastarhan jaıyp, shapan jabatynyn jetkizdi. Men aldymen kelisip, kabınetinen shyqqan soń oılanyp, bas tarttym. «Sen maǵan unamaısyń» degen sózi ar-namysyma tıip, sotqa aryzdandym», - dedi D.Ómirbek.

Meshit qyzmetkeri zańsyzdyq týraly aryz jazyp, oblystyq eńbek ınspektsııasy basqarmasynyń basshysy M.Raıymqulov, Qazaqstan musylmandary dinı basqarmasynan kómek suraǵan. Biraq eshqaısysynan jaýap joq.

«Buryn aı saıyn ortasha eseppen 34 myń teńge jalaqy alǵan edim. 2016 jyldyń mamyr aıynan bastap eńbekaqy bergen emes. Jaýapkerdiń zańsyz áreketterinen soń maǵan keltirilgen moraldyq zalal mólsherin 200 myń teńge dep baǵalaımyn. Sonymen qatar, 10 aıdyń eńbekaqysyn, 308 myń teńgeden astam jalaqyny óndirýdi surap otyrmyn. «Zeket» qoryndaǵy jumystan shettetildim, sol qyzmetke qaıta kiriskim keledi. Men óndirgen bar qarjyny medresege berýdi oılap otyrmyn. Maǵan aqsha emes, ádildik kerek», - dedi D.Ómirbek.