Aqtóbedegi Ortalyq bazardyń satýshylaryna basqa oryn qarastyrylady
AQTÓBE. QazAqparat - Aqtóbede ortalyq bazar satýshylar men saýda oryndarynyń ıeleri joldy jaýyp tastady. Bir saǵatqa sozylǵan narazylyqty taratýǵa qala ákimi Іlııas Ispanov keldi, dep habarlaıdy QazAqparat tilshisi.
Aqtóbedegi Ortalyq bazar satýshylary búgin saýda jasamaı, óz talaptaryn qoıdy. Buǵan deıin habarlaǵanymyzdaı, oblystyq tótenshe jaǵdaılar departamenti tekserý júrgizip, órt qaýipsizdigi sharasy múlde saqtalmaǵan coń birneshe uıǵarym bergen bolatyn. Sol kezde óńir basshysy Berdibek Saparbaev eger qaýipsizdik erejesi oryndalmasa bazardy jabýdy talap etti.
Oblys ákiminiń baspasóz qyzmetiniń habarlaýynsha, bazarlardy tekserý kezinde órt qaýipsizdigi erejesin buzýǵa qatysty 32 fakti anyqtalǵan. Osyǵan baılanysty ekonomıkalyq sotqa kemshilikter tolyqtaı joıylǵanǵa sheıin bazardyń qyzmetin toqtatý týraly talap-aryz berildi.
Tekserý barysynda evakýatsııalyq shyǵýdyń, ǵımaratta jáne bazarda arnaıy órt tehnıkasynyń bolmaýy, dabyl júıesiniń aqaýy anyqtalǵan.
Al jalǵyz tabys kózinen aıyrylyp qalamyn dep qoryqqan saýdagerler narazylyq tanytyp, joldy bir saǵatqa jaýyp tastady.
«Eki kún buryn kelip, bazar ishinde turǵan bizdiń ornymyzdy jabamyz dep eskertý berdi. Bizdi jumyssyz qaldyryp otyr. Ornymyzdy eshkimge bermeımiz. Tipti Ortalyq bazar ishine túneýge daıynbyz», - dedi satýshy Gúljan Moldakeshova.
Barlyǵy 200 oryn jabylyp, órt qaýipsizdigi úshin bazar ishi qaıta jaraqtalýy tıis. Bul jumysty atqarýǵa 1 aı ýaqyt berildi.
«Basqa bazardan oryn izdeýge kóshtim. Bizge 26 maýsymǵa deıin ýaqyt berilgen bolatyn. Oǵan deıin jumys istep, ortaq sheshim qabyldaýǵa kúsh salamyn. Biz de tyǵyryqtan shyǵa almaı otyrmyz. Eger tótenshe jaǵdaılar departamentiniń uıǵarymyn oryndamasaq, bazar túgel jumysyn toqtatady», - dedi Ortalyq bazar dırektory Elaman Iteǵulov.
Aıta keteıik, bazar satýshylarynyń narazylyǵyn toqtatýǵa oqıǵa ornyna qala ákiminiń orynbasary Kúlparshyn Aıdarhanova, jergilikti polıtsııa qyzmetkerleri men oblys prokýrorynyń birinshi orynbasary Aıdos Maılybaev kelip, halyqty sabyrǵa shaqyrdy. Keıin qala ákimi Іlııas Ispanov, oblys ákiminiń birinshi orynbasary Erbol Nurǵalıev kelip, ortaq sheshim qabyldaý úshin joldy ashyp, sóılesýge usynys jasady.
«Kemerovadaǵy qaıǵyly oqıǵadan soń tekserý bolyp, órt qaýipsizdigin qamtamasyz etýge birneshe uıǵarym berildi. Biz bárin zań aıasynda jasaýymyz kerek», - dedi qala ákimi Іlııas Ispanov.
Satýshylar men jergilikti ákimdik jıyn ótkizip, arnaıy jumys tobyn qurdy. Al bazar satýshylary 26 maýsymǵa deıin óz jumystaryn jalǵastyryp, olarǵa basqa oryn qarastyrylady.
