Aqtóbedegi órt kezinde qaza bolǵan eriktilerdiń týystary oqıǵanyń mán-jaıyn aıtyp berdi
AQTÓBE. QazAqparat - Aqtóbe oblysy, Áıteke bı aýdany, Sulýkól aýylyndaǵy órtten aman qalǵandar oqıǵanyń mán-jaıyn aıtyp berdi. Olar sapalaqpen (órt sóndiretin qural - avt.) órt sóndirip, áli kelmegen soń keri qaraı qashqan. Úlgermegenderi órt arasynda qalyp, mert boldy, dep habarlaıdy QazAqparat tilshisi.
Aqtóbeniń Sulýkól aýylyndaǵy órt kezinde 4 adam qaza boldy. Olar: aýyl ákimi Batyrbek Birlepesov, muǵalim Joldybek Ábdisálimov, mektep kúzetshisi Jomart Smaılov pen sharýa qojalyǵynyń jumysshysy Jańabaı Ábishev. Bári de órt sóndirýge shyǵyp, qaza boldy.
«Sulýkólde turamyn. Aýyl ákimi Batyrbek meniń aǵam. Órt 1 qyrkúıek kúni bastaldy. Kómek kórsetýge 3 qyrkúıek kúni bardym. Ol kezde órt Qostanaıdan keldi. Órt kúsheıip, álimiz kelmedi. Dalalyqta uıaly baılanys bolmady. Aýylǵa jaqyndaǵan kezde Batyrbek aýdan ortalyǵyna habar berdi. Adamdardyń sharshaǵanyn, órttiń kúsheıgenin jetkizdi. 4 qyrkúıekte órt aýylǵa jaqyndap, jel kúsheıdi. Aǵam sol oqıǵa ornynda qaza boldy. Arnaıy kıim degen múlde bolǵan emes. Órt sóndirýshiler órt sóngen soń keldi»,- dedi Nurbolat Qýshanov. Sulýkól aýylynyń ákimi Batyrbek Birlepesovtyń týǵan-týystary aýylǵa jaqyndaǵan órtti sóndiremin dep qaza bolǵan baýyrynyń madaqqa laıyq ekenin aıtyp otyr.
Sol kezde Áıteke bı aýdanynyń 7 aýylynda órt bolǵan. Aýdandaǵy eriktiler dala órtin sóndirýge jumyldyrylǵan. Olardyń qolyna sapalaq berilgen, keıbiri sýmen órt sóndirgen. Biraq aýdan, aýyl ákimdigi janynan jasaqtalǵan eriktilerdiń kúshi órtti sóndirýge jetpegen.
«Aýyl ákimi Batyrbek Birlesepov jel kúsheıip, órt aýylǵa 10 shaqyrym qalǵan kezde eki mashınamen shyqqan. Eriktiler sý búrikkishi bar órt sóndirý quralymen jáne sapalaqpen alaýdy sóndirgen. Biraq úsheýi órtten shyǵa almaı qaldy. Bir mezgilde 7 aýylda órt shyqty. Bárin birdeı qamtamasyz etý múmkin bolmady»,- dedi Áıteke bı aýdany ákiminiń orynbasary Temirbek Rahmetov.
Aıta keteıik, Sulýkól aýyly mańynday ótti 17 erikti sóndirgen. Órt lap qoıǵan kezde keıbiri qashyp, jan saqtaǵan.
«Órt jaqyndaǵan kezde qashyp shyǵyp, keıin qaıta keldim. Sol kezde aýyl ákimi Batyrbektiń qaza bolǵanyn kórdim. Sol jerde Jomartty, Joldybek boldy. Bireýi kómektesińdershi dep aıqaılasa, bireýi jerde jatty. Kıimderiniń bári janyp ketken eken»,- dedi aýyl turǵyny Dýlat Aıaǵanov.
Aıta keteıik, qazir osy oqıǵaǵa baılanysty Qylmystyq is qozǵaldy. Tergeý júrip jatyr. Al aýyl turǵyndary órt kezinde qaza bolǵan eriktilerdi erlikpen qaza tapty dep esepteıdi.
