Aqtóbedegi órt: Qaıyrymdylyq qorǵa aqsha jınalyp jatyr
AQTÓBE. QazAqparat - Aqtóbede órt kezinde páterleri jaramsyz bolyp qalǵan turǵyndar úshin «Qolqanat Aqtóbe» qoryna aqsha jınaý bastaldy, dep habarlaıdy QazAqparat tilshisi.
«Bul órt tótenshe jaǵdaı emes. Ári órt 69-páterden shyǵyp tur. Tergeý jumystary aıaqtalǵan soń bári anyqtalady. Zań boıynsha órtke páter ıesi sebepker bolsa, bári sol adamǵa júktelik, jóndeý júrgizilýi tıis. Biraq sheshimdi kútip otyrmaı, demeýshilerdiń kómegimen úlken jumystar atqarylyp jatyr. Qasbetin boıap qoıdyq. Tazartý, tereze salý bastaldy»,- dedi qala ákiminiń orynbasary Qýandyq Qasymov.
Aıta keteıik, búgin qala ákimdigi, máslıhat pen «Qolqanat Aqtóbe» qory birigip, jedel áreket etý úshin basqosty. Jedel shtab qurylyp, adamdardyń shyǵyny eseptelip jatyr. Qor hatshysy Jaınagúl Beısenbaeva kez kelgen adam habarlasyp, qarjy aýdarýǵa múmkindigi bar ekenin jetkizdi. Aldaǵy ýaqytta zardap shekken adamdarǵa qor arqyly ǵana aqsha aýdarylady.
Eske salsaq, Aqtóbedegi 9 qabatty úı órtenip, 200 adam qaýipsiz jerge kóshirilgen bolatyn. Sondaı-aq, oqıǵaǵa baılanysty arnaıy komıssııa quryldy. Búgin qalalyq ákimdik órt kezinde qutqarýǵa bar kúshterin jumsaǵan stýdentter men polıtsııa, demalysta júrgen órt sóndirý qyzmetkerlerin marapattady.
