Aqtóbedegi órt: Arnaıy komıssııa quryldy
AQTÓBE. QazAqparat – Muǵaljar aýdanynda gaz ballon jarylyp, bir bala kóz jumdy. Qazir arnaıy komıssııa qurylyp, shyǵyndy eseptep jatyr, dep habarlaıdy QazAqparat tilshisi.
24 aqpan kúni saǵat 23:51-de Aqtóbe oblysy TJD kezekshi-dıspetcherlik qyzmetine Muǵaljar aýyly, Zaýyt kóshesindegi úı̆de gaz ballon jarylyp, artynan órt shyqqany týraly habarlama tústi. Muǵaljar aýylynyń órt sóndirý bólimi, polıtsııa jáne jedel járdem brıgadasynan 13 adam jáne 4 tehnıka oqıǵa ornyna dereý jetti. Búgin oblystyq tótenshe jaǵdaılar departamenti oqıǵanyń mán-jaıyn túsindirdi.
«Órt sóndirý qyzmeti Embi qalasynan bardy. Eki aradaǵy qashyqtyq 37 shaqyrym. Órt sóndirý qyzmeti barǵan kezde úıdiń eki qabyrǵasy qulaǵany belgili boldy. Oqıǵa ornynda kúıik shalǵan eki adam qutqaryldy. Mamandar balanyń múrdesin alyp shyqty. Kórshileriniń aıtýynsha, túnde 50 l gaz ballon úıge kirgizilgen. Jarylyp, keıin arty órtke ulasqan», - dedi Aqtóbe oblystyq tótenshe jaǵdaılar departamentiniń bastyǵy Marǵulan Amanbaev.
Qazir aman qalǵan úı ıesi men ornyń balasy jansaqtaý bóliminde jatyr, al áıeli din aman. Ol aýyldaǵy týma-týystarynyń úıinde.
«Úı ıesiniń denesindegi kúıik 65-70 paıyzdy qurap otyr. Sonymen birge 1998 jyly týǵan balanyń qoly kúıgen. Kólemi 20% boldy. Jedel járdemmen aýdandyq aýrýhanaǵa tústi. Qazirgi kezde 53 jastaǵy otaǵasynyń jaǵdaıy asa aýyr. Al balanyń jaǵdaıy aýyr. Ekeýi de jansaqtaý bóliminde jatyr. Jaǵdaıy birqalypty bolǵan kezde sanavıatsııamen oblys ortalyǵyna jetkiziledi», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
Muǵaljar aýdanyna qarasty Muǵaljar aýylynda 330 úı bar. Onda 2 myńǵa jýyq adam turady. Munda gaz qubyry tartylmaǵan. Ázirge tek jobalyq-smetalyq qujat daıyndalyp jatyr.
«Jedel komıssııa quryldy. Quramynda tótenshe jaǵdaılar qyzmeti, polıtsııa, aýdan ákimdiginiń ókili men depýtattar bar. Úı jaramsyz kúıge túsken. Aýylda bos turǵan 2-3 úı bar eken. Eń jaramdysyn bıýdjetten tys qarjyǵa satyp alatyn bolamyz. Úıge qajetti turmystyq tehnıka iri óndiris oryndary, kásipkerlerdiń qoldaýymen alynady. Sonymen birge ómirlik qıyn jaǵdaıǵa tap bolǵan otbasyǵa kómek kórsetetin komıssııa otyrysy ótedi. Bıýdjetten de qarjy bólinedi. Jerleý rásimine kómek beriledi», - dedi oblys ákiminiń birinshi orynbasary Nurjaýǵan Qalaýov.
