Aqtóbedegi óndiris oryndary jumysshylaryna 47 mıllıon teńge qaryz
AQTÓBE. QazAqparat - Aqtóbedegi jumys berýshiler eńbekkerlerine 47,5 mıllıon teńge qaryz. Qazirgi kúni oblysta 4 kásiporyn jumysyn toqtatyp, jeteýi bankrot boldy. Bul týraly oblys ákimdigindegi ótken eńbek qatynastaryna qatysty jıynda aıtyldy, dep habarlaıdy QazAqparat tilshisi.
Aqtóbede eńbek qatynastarynyń jaǵdaıy turaqty. Jappaı jumystan shyǵarý, qysqartý tirkelgen joq. Aqtóbe oblystyq eńbek ınspektsııasy basqarmasynyń basshysy Meıirbolat Raıymqulovtyń aıtýynsha, jyl basynan beri 1 280 shaǵym tústi. Aryz boıynsha 500-den astam tekserý júrgizildi. Barlyǵy 1 myńnan astam zańbuzýshylyq tirkelse, onyń 72 paıyzy eńbek qatynastary suraqtaryna baılanysty boldy. Kóbi eńbekaqyny durys eseptemegen, ýaqytynda jalaqy tólemegen.
«Jumysshylar aldyndaǵy kelisimsharttyq mindetter, ujymdyq jáne eńbek kelisimsharttary boıynsha mindetter, memorandýmdar oryndalýy tıis. Qaryzǵa jol bermeı eńbekaqynyń ýaqytyly tólenýin qamtamasyz etýlerińiz qajet. Bul respýblıkamyzdyń zańdarymen qarastyrylǵan, oryndamaǵan adam jazalanatyn bolady», - dedi Aqtóbe oblysynyń ákimi Berdibek Saparbaev.
Aıta keteıik, jyl basynan beri eńbekaqy qaryzynyń 620 mıllıon teńgesi óteldi. Qazirgi kezde óńirde 4 kásiporyn toqtap tur, jeteýi bankrotqa ushyrap, ońaltýdan ótip jatyr. Aqtóbe oblysy ákiminiń baspasóz qyzmetiniń habarlaýynsha, jumys berýshilerdiń eńbekkerler aldyndaǵy qaryzy - 47,5 mıllıon teńge. «Jaǵdaı baqylaýda, eńbek ujymdaryndaǵy jaǵdaı turaqty, qaryzdar aı saıyn ótelip jatyr», - Aqtóbe oblystyq eńbek ınspektsııasynyń basshysy M.Raıymqulov.
Áleýmettik jaǵdaıdy turaqtandyrý baǵytyndaǵy jumys kezinde ákimdik, kásipodaq pen kásiporyn basshylary arasyndaǵy memorandýmdardyń, ujymdyq jáne jeke eńbek kelisimsharttarynyń mańyzy zor. Oblystyq kásipodaq tóraǵasy Túrikpenbaı Aıjaryqovtyń aıtýynsha, 84 myń adamdy qamtıtyn 7 myńnan astam memorandýmdarǵa qol qoıylǵan. Oblys ákimi Berdibek Saparbaev vahtalyq aýyldardaǵy jumystan tys bos ýaqyty uıymdastyrý jáne moraldyq-psıhologııalyq ahýaldy jaqsartý máselelerine arnaıy toqtaldy.
