Aqtóbedegi óndiris oryndary jergilikti ǵalymdarmen baılanys jasaýǵa nıet tanytpaı otyr
AQTÓBE. QazAqparat - Aqtóbelik jas ǵalymdar iri óndiris oryndarynan tapsyrys ala almaı otyr. Aqtóbede ǵylymı ortalyq bar, biraq kúrdeli zertteý jumystaryn júrgizetin zerthana joq.
Bul týraly Jas ǵalymdar keńesi qorynyń jetekshisi Jaıyq Sultan aıtty, dep habarlaıdy QazAqparat tilshisi.
Ǵylym damysa, óndiris alǵa basady. Kez kelgen jańalyq el ekonomıkasyn órge súıreıdi. Aqtóbede jas ǵalymdardyń basy qosylyp, ortalyq qoldanysqa berilgenimen, tapsyrys az. Іri óndiris oryndary jergilikti ǵalymdardyń jobalaryna emes, sheteldik zerthanalardyń usynystaryna basymdyq beredi.
Aqtóbelik jas ǵalymdar iri óndiris oryndarynan tapsyrys ala almaı otyr. «Ǵylymı qor jobalarǵa grant berýdi bastady. Olar bizdiń qolymyzda joq ónimniń kelisimshartyn suraıdy. ıAǵnı, aqtóbelik ǵalymdar jasap shyǵarmaǵan, óndiriske engizbegen jobanyń satyp alýshysy bolýy kerek. Sonymen qatar, jobanyń 50 paıyzyn ǵylymı ortalyq qarjylandyrýy kerek eken. Osy talaptar ǵylymnyń damýyna keri áserin tıgizip keledi. Biz iri jobalardy iske asyryp, jastardy ǵylym jolyna baǵyttaǵymyz keledi. Talaptar bizge kedergi keltirip tur»,- dedi Jas ǵalymdar keńesi qorynyń jetekshisi Jaıyq Sultan. Aqtóbelik ǵalymdar baıqaýǵa qatysý kezinde qujattardyń túgel aǵylshyn tiline aýdarylýy qajet degen talapty oryndaý da qıyn ekenin aıtyp otyr. Ári jergilikti óndiris oryndary jas ǵalymdarǵa emes, álemdik bedeli bar zerthana qyzmetkerlerine basa kóńil bóledi. «Aqtóbe ferroqorytpa zaýytyna, Aqtóbe hrom qosyndylay zaýytyna birneshe joba ázirlep, usynǵan edik. Máselen, hrom men magnııdi aıyrý jobasy da qoldaý tappady. Olar tek álemdik aty bar ǵalymdarmen baılanys jasaýdy jón kóretinin aıtty. Biz tehnogendi qaldyqtardy joıý jobasyn usynyp, qoldaý tappadyq. Óndiris oryndary qoldamasa, ǵylym sol kúıi damymaı qalady»,- dedi Jaıyq Sultan. Aqtóbelik jas ǵalymdar ǵylymmen aınalysatyn ǵımarat pen shaǵyn zertteý quraldary bolǵanymen kóbine reseılik zerthanalardan kómek suraıtyndaryn jasyrmady.
