Aqtóbedegi oqýshy ólimi: Densaýlyq basqarmasy jedel járdemniń kesh barǵanyn rastady
AQTÓBE. QazAqparat - Aqtóbede oqýshy qyzdyń ólimine qatysty tergeý jumystary bastaldy. Oblystyq densaýlyq saqtaý basqarmasy jedel járdemniń kesh barǵanyn moıyndap, dáriger men feldsherdi jumystan shettetti, dep habarlaıdy QazAqparat tilshisi.
Aqtóbede 7 jastaǵy Іnjý Jakınanyń óliminen soń oblystyq densaýlyq saqtaý basqarmasynda komıssııa quryldy. Aldyn ala belgili bolǵany, bala tilin jutyp qoıyp, aýa jetpegen soń kóz jumǵan.
«Aqtóbe oblystyq densaýlyq saqtaý basqarmasy Qoǵamdyq densaýlyq saqtaý komıtetine táýelsiz komıssııa qurýǵa usynys berdi. Beınematerıal áleýmettik jeli arqyly tarap ketip, oblystyq prokýratýra jedel tekserýdi tapsyrdy. Ókinishke qaraı, oblystyq densaýlyq saqtaý basqarmasy oqýshynyń ólimi týraly der kezinde bilmedi. Keshe arnaıy komıssııa qurylyp, emhana dárigerleri, jedel járdem brıgadasy, mektep medbıkesimen kezdesý ótip, ata-anasymen sóılestik. Bir kún ishinde eki jaǵdaı anyqtaldy. Jedel járdemniń kesh barǵany ras. Jedel járdem 49 mınýtta bardy. Onyń eki sebebi bar. Birinshiden, ata-anasy tek qyzýy joǵary dep habarlaǵan. Qońyraýdy qabyldap otyrǵan dıspetcher «óte joǵary temperatýra» dep kórsetpegen soń bul tórtinshi kategorııadaǵy shaqyrýǵa kirdi. Ekinshiden, mekenjaıy durys jazylmady. «Nur Aqtóbeniń» №4 móltek aýdany dep aıtyldy. Qaıta habarlasyp, jedel járdem brıgadasy oqıǵa ornyna bardy», - dedi oblystyq densaýlyq saqtaý basqarmasy basshysynyń orynbasary Svetlana Esenamanova.
Oblystyq densaýlyq saqtaý basqarmasy janynan qurylǵan komıssııa jádel járdem brıgadasynyń kinásin anyqtap berdi. Dárigerler deontologııa zańdylyǵy, ıaǵnı, etıkany buzyp, shaqyrǵan adamdarmen sózge kelip qalǵany úshin jazalandy. Dáriger men feldsher qazir ýaqytsha jumystan shettetildi.
«Dáriger barǵan kezde balanyń qoly muzdap, kógere bastaǵan. Balanyń basy solǵa qarap jatty. Anasy alǵashqy kómek kórsetip, aıaq-qoly qurysqanda tilin shyǵarý úshin aǵash qasyqty qoldanǵan. Sulyq jatqan, eshqandaı da belgi bolmaǵan soń jasandy tynys alý jumystary júgizilmedi», - dedi Svetlana Esenamanov.
Eske salsaq, Aqtóbede oqýshy jedel járdem brıgadasy jetpeı kóz jumdy. Oqıǵa «Nur-Aqtóbe» yqsham aýdanyndaǵy turǵyn úılerdiń birinde boldy. Qazirgi ýaqytta oqıǵaǵa baılanysty arnaıy komıssııa jumys júrgizip jatyr. Іs qujattarynyń bári prokýratýraǵa, sotqa joldanady. Svetlana Esenamanovanyń aıtýynsha, 7 jastaǵy qyzdyń densaýlyǵynda qandaı da bir kinárat bolmaǵan, mektepke barmas buryn medıtsınalyq komıssııadan ótken.
