Aqtóbedegi Naýryz: Ulttyq taǵamdar tegin úlestirildi
Kórisý kúni aıasynda oblys jastary birigip, Baýyrsaq merekesin uıymdastardy. Barlyǵy 12 aýdannyń jastary ortalyq saıabaqqa dastarhan jaıyp, arnaıy kontsertti tamashalaýǵa kelgenderge baýyrsaq, ulttyq taǵamdar usyndy.
«Ulystyń uly kúnine arnaıy daıyndalyp, Baıǵanın jastary bir tonna baýyrsaq pisirdi. Baýyrsaqtyń pishini ártúrli. Osylaısha jastar resýrstyq ortalyǵynda jumys isteıtin qyzmetkerleri birigip, tátti syı jasady. Sonymen qatar, sút jáne sút ónimderi qala turǵyndaryna usynyldy. Adamdar kóktem kelip, qystyń yzǵarly kúnderi artta qalǵan kezde mereke uıymdastyrǵan bizge alǵysyn bildirip jatyr»,- dedi Baıǵanın aýdandyq resýrstyq ortalyq jetekshisi Saıa Saǵynǵalıeva.
Al ataqty tary ósirýshi Shyǵanaq Bersıev aýdanynyń jastary tary, talqan, qurt pen maı, baýyrsaq usyndy.
«Oıyl aýdanynyń jastary Baýyrsaq merekesine arnaıy daıyndaldy. Biz aýylda óndiriletin tary, talqan ákeldik. «Jaqyp» sharýa qojalyǵy tary sharýashylyǵyn damytyp, shetelge ónim shyǵaryp jatyr. Ulttyq taǵamdardyń bári qala halqy úshin tańsyq ári suranys joǵary. Bul joly bárin tegin úlestirdik. Halyq óz alǵysyn bildirip jatyr»,- dedi Oıyl aýdandyq resýrstyq ortalyǵynyń jetekshisi Jangúl Іzǵarına.
Búgin Baýyrsaq merekesi, erteń keshilik jastar saıabaqqa jınalyp, Bastańǵy ótkizedi. Stýdentter men qala jastary altybaqan teýip, án shyrqaıdy, óz ónerlerin kórsetedi.
Búgingi Naýryz merekesine «Asyl ájeler» ansambli de qatysty. Olar jastarǵa Kórisý kúniniń mán-maǵynasyn túsindirip berdi.
«Ata-babamyzdan qalǵan salt-dástúrmen búgin Kórisý kúnin ótkizdik. Buryn toılanyp, keıin umyt qalǵan edi. Táýelsizdigimizdi alǵan soń qaıta jańǵyryp, el ulttyq saltymen qaıta qaýyshty. Biz jastarǵa ósıet etemiz, olar bizden úlgi alyp júr»,- dedi ájeler ansambliniń múshesi Kúlán Nurjanova.
Saıabaqta arqan tartý, gir kóterý, kúsh synasýdan jarys ótti. Kez kelgen aqtóbelik óz kúshin synap kórýge múmkindik aldy. Jastar resýrstyq ortalyǵynyń uıymdastyrýymen ótken «Qosh keldiń, Naýryz» atty merekelik sharaǵa aqsaqaldar arnaıy shaqyryldy. Olar bata berip, qaıta jańǵyrǵan ulttyq salt-dástúrimizdiń túpki maqsatyn túsindirdi.
«Tatýlyqqa, birlikke shaqyratyn mereke kezinde jastar belsendilik tanyty. Aqtóbe oblystyq drama teatr, shyǵarmashylyq ujymdary túgel qatysty. Alda bir aı toı bolady. 21 naýryzda Jarapazan aıtylyp, Qydyr ata aqtóbelikterdi úılerine baryp, quttyqtaıdy»,- dedi Aqtóbe oblystyq mádenıet basqarmasynyń basshysy Marjan Qorǵanbaeva.
Aıta keteıik, Aqtóbede Ulystyń uly kúni bir aı boıy toılanady. 
