Aqtóbedegi mys kompanııasy múgedek balalarǵa arnalǵan emhana salyp beredi
AQTÓBE. QazAqparat - Aqtóbedegi mys kompanııasy geologııalyq barlaý jumystaryn júrgizip, kásiporyndy jańǵyrtady. Oblys ákimi Berdibek Saparbaev pen «Orys mys kompanııasy» AQ dırektorlar keńesiniń tóraǵasy Igor Altýshkın memorandýmǵa qol qoıdy, dep habarlaıdy QazAqparat tilshisi.
Qazaqstan men Reseıdiń XIV óńiraralyq yntymaqtastyq forýmy eki el kásipkerleri úshin tıimdi boldy. Máselen, búgin Aqtóbe oblysynyń ákimi Berdibek Saparbaev pen «Orys mys kompanııasy» AQ dırektorlar keńesiniń tóraǵasy Igor Altýshkın ınvestıtsııalyq seriktestikti damytý memorandýmyna qol qoıdy. Aqtóbe oblysy ákiminiń baspasóz qyzmetiniń habarlaýynsha, taraptar qatty paıdaly qazbalardy geologııalyq barlaý, nıkeldi ıgerý, kásiporyndy jańǵyrtý kelisimin jasady.
«Elbasy Nursultan Nazarbaevtyń tapsyrmasy aıasynda Aqtóbe oblysy ınvestıtsııa tartyp, sonyń ishinde reseılik seriktestermen belsendi jumys atqaryp jatyr. «Orys mys kompanııasy» joǵary ekologııalyq standarttardy ustanatyn jaýapty ınvestor. Sonymen qatar, oblystyń áleýmettik damýyna úles qosyp keledi. Jobany júzege asyrý salyq tólemderin ósirip, jańa jumys oryndaryn ashýǵa, halyqtyń ómir sapasyn arttyrýǵaa múmkindik beredi», - dedi oblys ákimi Berdibek Saparbev.
Ekijaqty kelisim kezinde oblysqa 105 mıllıon teńge ınvestıtsııa salynatyny belgili boldy.
«Áleýmettik jaýapkershilik aıasynda birlesip jumys isteımiz. Kelesi jyly mys kompanııasy múgedek balalardy emdeıtin emhana qurylysyn bastaıdy. Jalpy kompanııa kelisimsharttaǵy barlyq mindettemelerdi oryndap otyr. Jumys orny qysqarǵan joq, jalaqy ýaqytyly berilip tur», - dedi óńir basshysy B.Saparbaev. Kelisim kezinde «Orys mys kompanııasy» AQ dırektorlar keńesiniń tóraǵasy Igor Altýshkın áleýmettik salaǵa qoldaý bildiretinin jetkizdi.
«Tabıǵı resýrstarǵa baı, memlekettik qoldaýy birjolǵa qoıylǵan óńirmen jumys istegen óte jaqsy nátıje beredi. Biz jańa jobalarǵa ınvestıtsııa salyp, Aqtóbe oblysynyń kadr áleýeti men áleýmettik salasyn damytý jumysyn ári qaraı jalǵastyramyz»,- dedi Igor Altýshkın.
Aıta keteıik, mys kompanııasy 2004 jyldan beri Qazaqstan ekonomıkasyna 868 mln dollar ınvestıtsııa saldy. Elimiz boıynsha bul kompanııada 1 700-ge jýyq adam jumys isteıdi. Aqtóbe oblysynyń bıýdjetine jyl saıyn 1 mıllıon dollar túsip tur.
