Aqtóbedegi mýzykalyq kolledj Dımashtyń fanattaryna qurmet kórsetti
Dımash Qudaıbergen mýzykalyq kolledjde bilim alyp júrip, alǵashqy baıqaýlardy jeńiske jetken soń fanattary kelip, ol bilim alǵan oqý ornymen tanysýdy ádetke aınaldyrǵan. Bul joly Aqtóbege Los Andjelesten Patrısııa Grýllıon keldi. Ol Dımash Qudaıbergenniń oryndaýyndaǵy ánderge tánti bolyp, Oral qalasynda ótken keshke arnaıy qatysty. Kezdesti, yqylasyn bildirdi. Keıin onyń týǵan jeri men bilim alǵan ordasyna kelip, ustazdarymen tanysýǵa sheshim qabyldaǵan.
«Dımash Qudaıbergenniń fanattarymen tanysyp, olarǵa ulttyq salt-dástúrimizdi tanystyrdyq, dástúrli ánder shyrqalyp, qyzdar bı bıledi. Shubattan dám tatty. Keıin kolledjde bilim alyp júrgen ózge talantty balalardyń ónerin tamashalap, ózderiniń tańdanysyn jasyra almady. Eshkimge uqsamaıtyn ereksheligimizdi, qonaqjaılylyǵymyzdy kórdi. Olar bizden baılanysty bolady. Buryn AQSh elshiligimen tyǵyz qarym-qatynasta edik. Biraq sońǵy jyldary baılanys úzilip qaldy. Endi úzilgen baılanysty qaıta jalǵaımyz. Olar bizge, biz olarǵa kontserttik baǵdarlamamen barýymyz múmkin»,- dedi Ahmet Jubanov atyndaǵy mýzykalyq kolledj dırektory Amanjol Ismaǵulov.
Aqtóbege kelgen Patrısııa Grýllıon Ahmet Jubanov atyndaǵy mýzykalyq kolledjdiń murajaıyn tamashalap, óz qoltańbasyn qaldyrdy. Kezdesýde kolledj oqytýshylary men ardagerler, oqý ornynyń tuńǵysh dırektory Qaıyrǵalı Qojanbaev boldy.
«Shetelden, Qazaqstannyń ózge óńirlerinen fanattar kelip jatyr. Patrısııa Grýllıon arnaıy kelgen soń ustazy Marat Áıtimovpen kezdesti. Birneshe stýdenttiń oryndaýynda jaqsy ánder tyńdady. Bizdiń túlegimiz Svetlana Kasıandy da tanıdy eken. Ol qazir Reseıde turady, opera ánshisi bolyp jumys isteıdi»,- dedi Amanjol Ismaǵulov.
Al Dımash Qudaıbergenniń fanaty Patrısııa Grýllıon ánshiniń ustazy Marat Áıtimovke alǵys aıtty.
«Dımash Qudaıbergenniń ustazy Marat Áıtimovpen tanysý baqyty buıyrdy. Ustazy myqty, Dımashtyń joly bolǵan. Ol bizge ýaqyt bólip, janashyrlyq tanytty»,- dedi Patrısııa Grýllıon.
