Aqtóbedegi munaı kompanııasynda bir jumysshy qaza bolyp, bireýi aýrýhanaǵa tústi
AQTÓBE. QazAqparat - Aqtóbe oblysy, Jańajol aýylyndaǵy ken ornynda qaıǵyly jaǵdaı tirkeldi. «SNPS-Aqtóbemunaıgaz» AQ-nyń bir jumysshysy qaza bolyp, bireýi aýrýhanaǵa tústi, dep habarlaıdy QazAqparat tilshisi.
«SNPS-Aqtóbemunaıgaz» AQ-y keshe saǵat 18:24-te Jańajol ken ornynda jumys istep júrgen eki adamnyń jaraqat alǵanyn habarlady. Qaıǵyly jaǵdaı kezinde 54 jastaǵy er adam qaıtys boldy. Al 46 jastaǵy jumysshy Keńqııaq aýrýhanasynda jatyr. Qazirgi kezde zardap shekken adamdy oblys ortalyǵyna ákelip, em kórsetý máselesi sheshilip jatyr. Ekeýi de slesar bolyp jumys istegen. Ken ornynda buǵan deıin shaǵyn jóndeý jumystary júrgizilip, eki jumysshy nasostyń qalaı jumys istep jatqanyn kórmek bolǵan. Bul nasos tehnıkalyq sýdy aıdaıdy. Sol jerde gaz shyqqan»,- dep habarlady Aqtóbe oblystyq eńbek ınspektsııasy jónindegi basqarma basshysynyń orynbasary Baýyrjan Orazaev.
Aıta keteıik, osy oqıǵaǵa baılanysty arnaıy komıssııa quryldy. Eńbek kodeksi boıynsha 10 jumys kúni ishinde oqıǵanyń naqty sebebi anyqtalady. Komıssııa qorytyndysy ishki ister organdaryna jiberilip, tergeýdi quqyq qorǵaýshylar jalǵastyrady.
Aqtóbe oblystyq eńbek ınspektsııasy jónindegi basqarma basshysynyń orynbasary Baýyrjan Orazaevtyń aıtýynsha, oblys boıynsha qańtar aıynda 6 jumysshy óndiriste jaraqat aldy. Onyń ekeýi qaza boldy. Jazataıym oqıǵa «OPS Sekıýrıtı» jáne «Kóktas Aqtóbe» JShS-de tirkeldi.
Foto: https://www.cnpc-amg.kz
