Aqtóbedegi Mırzoıan eskertkishin qashan alyp tastaıdy
AQTÓBE. QazAqparat - Aqtóbedegi Mırzoıan eskertkishin kimderdiń alyp tastaıtyny belgisiz. Jergilikti ákimdik arnaıy komıssııa sheshiminen soń mán-jaıdy aıtyp beredi, dep habarlaıdy QazAqparat tilshisi.
Aqtóbe qalasyndaǵy Mırzoıan kóshesi endi Álıhan Bókeıhan bolyp ózgeredi. Buǵan deıin habarlaǵanymyzdaı, usynysty respýblıkalyq onomastıkalyq komıssııa maquldady. Endi Aqtóbe oblystyq máslıhaty sheshim shyǵarýy kerek. Alaıda Mırzoıan kóshesindegi eskertkishti kimderdiń alatyny belgisiz.
«Mırzoıan eskertkishi tirkeýge alynǵan joq. Onyń qujattary rásimdelmegen, tizimge alynbaǵan. Eskertkishti alý jumystaryn mádenıet basqarmasy sheshedi»,- dedi Aqtóbe oblystyq tarıhı-mádenı muralardy qorǵaý jónindegi memlekettik ınspektsııasynyń bas ınspektory Farhad Dosmuratov.
Al Aqtóbe qalalyq mádenıet bólimi bul suraqqa jaýap bere almady. Aqtóbe oblystyq mádenıet, arhıvter jáne qujattama basqarmasynyń basshysy Marjan Qorǵanbaeva bári arnaıy komıssııa sheshiminen soń belgili bolatynyn habarlady.
«Mırzoıannyń kóshesi ózgerdi, endi eskertkish máselesi qaralady. Taıaýda komıssııa otyrysy bolyp, suraq kóteriledi. Negizi qala terrıtorııasynda ornalasqan eskertkishtiń barlyǵy jergilikti mańyzy bar bolǵandyqtan oǵan ákimdik jaýapty. Bári turǵyn úı-kommýnaldyq sharýashylyǵy bóliminiń balansynda tur. Aýdandaǵy eskertkishterge - aýdandar, mekeme aýlasyndaǵy eskertkish mekemege tirkeledi. Sondyqtan komıssııa sheshimin qalalyq ákimdik oryndaıdy. Mırzoıan eskertkishi tizimde joq bolǵan soń bári komıssııa sheshimine baılanysty bolady»,- dedi Marjan Qorǵanbaeva.
