Aqtóbedegi mektep oqýshysy júregi toqtap kóz jumǵan-basqarma
AQTÓBE. QazAqparat - Aqtóbe qalasyndaǵy №38 orta mektep oqýshysy óliminiń sebebi anyqtady, dep habarlaıdy QazAqparat tilshisi.
Búgin óńirlik kommýnıkatsııalar qyzmetinde baspasóz konferentsııasyn ótkizgen Aqtóbe oblystyq densaýlyq saqtaý basqarmasynyń basshysy Áset Qalıev saraptama qorytyndysyn jarııalady.
«Sol kezde jedel járdemge 6 qońyraý túsken. Adamdar 1-2 mınýt saıyn habarlasqan. Jedel járdem 14 mınýtta jetti. Oǵan deıin mektep medbıkesi alǵashqy kómek kórsetti. Ókinishke qaraı, oqýshy mektepte kóz jumdy. Sot-medıtsınalyq saraptama qorytyndysyna súıensek, oqýshynyń júregi kenetten toqtap qalǵan. Mundaı jaǵdaı óte sırek bolsa da kezdesedi. Keıbir adamdar uıyqydan oıanbaıda qalýy múmkin»,- dedi basqarma basshysy Áset Qalıev.
Eske sala keteıik, Aqtóbe qalasyndaǵy №38 orta mektep oqýshysy Dilnaz Ábisheva oqý ornynda kóz jumǵan bolatyn. Al 5 synyp oqýshysynyń anasy Záýresh Erǵalıeva qyzynyń aýyrmaǵanyn, bári kenetten bolǵanyn aıtyp bergen edi.
