Aqtóbedegi medıtsınalyq ortalyqta alǵash ret júrekke kúrdeli ota jasaldy
AQTÓBE. QazAqparat -Aqtóbe medıtsınalyq ortalyǵynyń kardıologtary sheberlik sabaǵyna qatysyp, alǵash ret júrekke kúrdeli ota jasady. Qazirgi ýaqytta naýqastardyń jaǵdaıy birqalypty. Ekeýi aýrýhanadan shyqty, dep habarlaıdy QazAqparat tilshisi.
Aqtóbede medıtsınalyq klasterdi damytý maqsatynda kúrdeli operatsııalar sheberlik sabaǵy túrinde ótedi. Naýryz merekesi kúnderi Astana qalasyndaǵy ǵylymı kardıohırýrgııa ortalyǵy, arıtmologııa bóliminiń meńgerýshisi, medıtsına ǵylymdarynyń doktory Aıan Abdrahmanovtyń qatysýymen júrekke kúrdeli ota jasaldy.
«Aqtóbe medıtsına ortalyǵynda tórt ota jasaldy. Onyń bireýi aýrýhanada alǵash ret júrgizildi. ıAǵnı, SPT D arqyly júrektegi aqaý retteldi. Naýqastardyń jasy ártúrli. Olar 30-60 jas aralyǵyndaǵy naýqastar júrek yrǵaǵynyń buzylý dertine shaldyǵyp, emhanada tirkelip, portalmen keldi. Biz sheberlik sabaǵyn ótkizip, kúrdeli otany meńgerýdi qolǵa aldyq»,- dedi Aqtóbe oblystyq medıtsına ortalyǵynyń kardıolog - arıtmologi Jambyl Jaılybaev. Dárigerler bir kúnde tórt naýqasqa ota jasaýǵa 10 saǵatyn jumsady. Júrek yrǵaǵynyń buzylýy, júrek jıyrylýynyń nasharlaýy, qan aınalymnyń buzylýy, júrek kamerasynyń úlkeıýi.
«Júrek aýrýy jasqa qaramaıdy. Keıde shuǵyl ota jasaý qajet jaǵdaılar tirkeledi. Júregi toqtap qalǵandar da kómek alady. Aqtóbe oblystyq medıtsınalyq ortalyǵyndaǵy alǵashqy otanyń sheberlik sabaǵyna kardıolog Bolat Hamıdýlla da qatysty. Biz kúrdeli operatsııany aldymen sheberlik sabaǵy arqyly jasap, keıin ózimiz meńgeremiz. Al júreginde «shým» bar 15 naýqasqa ózimiz kómek berdik. Bul bizde jıi jasalatyn ota»,- dedi Jambyl Jaılybaev.
