Aqtóbedegi máıittik donordyń aǵzalary Astanaǵa jóneltildi
AQTÓBE. QazAqparat - Aqtóbede jyl basynan beri ekinshi ret máıittik donordyń kómegimen búırek aýystyrý otasy jasaldy. 45 jastaǵy áıelge «mıy ólgen» dıagnozy qoıylyp, aqtóbelik dárigerler búıregi aýyratyn 9 naýqastyń sáıkestigin teksergen, dep habarlaıdy QazAqparat tilshisi.
Aqtóbelik dárigerler alǵashynda Ońtústik Koreıa dárigeri Kvang Výng Lıden dáris alyp, sheberlik sabaǵyn ótkizdi. Bıyl búırek aýystyrý otasyn ózderi jasap jatyr. Bul joly 45 jastaǵy áıeldiń «mıy ólgen» dıagnozyn qoıǵan soń onyń týǵan-týystarymen kelissóz júrgizildi. Kelisimnen soń dárigerler Almaty men Astana qalalaryna túrli saraptamalar jibergen.
«Máıittik donor belgili bolǵan soń 9 adamdy shaqyryp, sáıkes kelgen 3-4 adamnan jaǵdaıy nashar naýqas tańdap alyndy. Birinshisi, 36 jastaǵy áıel. Ol bir jyldan beri apparatqa tańylǵan. Ekinshisi, 58 jastaǵy er adam. Ol úsh jyldan beri gemodıalız qabyldap júr. Bir túnde eki adamnyń búıregi aýystyryldy. Ota sátti ótti. Qazirgi kezde naýqastardyń jaǵdaıy qalypty»,- dedi Aqtóbe oblysynyń bas hırýrgi Erlan Sultangereev. Aqtóbelikter eki búırek aýystyrý otasyn jasasa, máıittik donordyń júrek, eki ókpesi, baýyr, eki kózi Astanaǵa jiberilgen. Bir adamnyń aǵzalary barlyǵy 7 adamǵa salyndy.
Aıta keıik, Aqtóbe oblysynda 24 búırek aýystyrý, 7 baýyr aýystyrý otasy jasaldy. Naýqastar men donorlardyń jaǵdaıy jaqsy. Ońtústik Koreıa dárigerleri qazirgi ýaqytta aqtóbelikterge baýyr aýystyrý otasyn jasaýdy úıretip jatyr.
