Aqtóbedegi máıittik donor daýy: Dárigerlerdiń jumysy zańdy
AQTÓBE. QazAqparat - Aqtóbe polıtsııasy máıittik donor daýyna qatysty isti tergep, dárigerlerdiń jumysy zańdy dep sheshim shyǵardy. Qazir tergeýshilerdiń sheshimin prokýratýra qarap jatyr, dep habarlaıdy QazAqparat tilshisi.
Aqtóbede máıittik donorǵa qatysty daý shyǵyp, qaza bolǵan Serikbolsyn Kósherbaıdyń týǵan-týystary sotqa aryz túsirgen bolatyn.
Buǵan deıin habarlaǵanymyzdaı, azamattyń is kezinde qaza bolǵan jigittiń týystary dárigerlerden moraldyq shyǵyn retinde 1 mıllıon teńge talap etip, keıin is toqtatyldy.
Aqtóbege Ulttyq transplantologııany úılestirý ortalyǵynyń dırektory Jaqsylyq Dosqalıev arnaıy kelip, marqumnyń otbasyna kóńil aıtyp barýǵa kelisti. Máıittik donordyń zańdylyǵymen tanystyryp, adamnyń «mıy ólgen» kezde esh ruqsatsyz onyń aǵzasyn alýǵa ruqsat etiletin tártipti túsindirdi. Degenmen Serikbolsyn Kósherbaıdyń týystary jazǵan aryzǵa baılanysty polıtsııa qylmysty isti tergedi.
«Serikbolsyn Kósherbaıdyń dene múshesin transplantatsııalaý deregine qatysty týystarynyń aryzy boıynsha Zaýyt polıtsııa bólimi sot aldy tergeý jumystaryn júrgizip, qylmystyq quqyq buzýshylyq quramy bolmaǵandyqtan isti toqtatty. Qylmystyq kodekstiń «adam máıitiniń aǵzalary men tinderin zańsyz alý» baby boıynsha dárigerlerdiń jumysyna quqyqtyq baǵa berildi.
Tergeý máıittik donor erejesiniń buzylmaǵanyn anyqtady. Prokýratýra sheshimniń zańdylyǵyn qarap jatyr», - dep jazdy óz paraqshasynda oblystyq prokýratýranyń apparat basshysy Jasulan Dáýlembaev.
