«Aqtóbedegi lańdy dinniń atyn jamylyp, munaı urlaýmen aınalysqan qylmystyq top jasapty» - respýblıkalyq basylymdarǵa sholý
***
Keshe Úkimet otyrysynda Eńbek jáne halyqty áleýmettik qorǵaý mınıstri Gúlshara Ábdiqalyqova «Jumyspen qamtý - 2020» baǵdarlamasynyń tusaýyn kesken bolatyn. Onda vedomstvo basshysy atalǵan baǵdarlama negizinde 2015 jylǵa qaraı jumyssyzdyq deńgeıin 5,5 paıyzǵa deıin tómendetý kózdeletindigin aıtty. Osy oraıda «Egemen Qazaqstan» basylymynyń búgingi sanynda Úkimet otyrysynda aıtylǵan keleli maqsattar jaıynda egjeı-tegjeıli baıandalǵan. «Mınıstrdiń aıtýy boıynsha, 2015 jylǵa qaraı elimizde 1,5 mıllıonǵa jýyq adam osy baǵdarlamaǵa tartylyp, elimizdegi kedeılik deńgeıi 6 paıyzǵa deıin azaıatyn, al jumyssyzdyq deńgeıi 5,5 paıyzǵa deıin tómendeıtin bolady. Baǵdarlamany qanatqaqty rejimde iske asyrýǵa bıylǵy jyly respýblıkalyq bıýdjetten barlyǵy 40 mıllıard teńge teńge bólindi», - delingen «Jumyspen qamtý - 2020» baǵdarlamasy júzege asyrylmaq» degen taqyryppen berilgen maqalada.
***
«Daǵdarystan keıin damý qarqynyn qaıta údetken Qazaqstan keıbir kórsetkishter boıynsha tipti Amerıkadaı alpaýyttyń ózin basyp ozdy», - dep jazady «Aıqyn» gazeti búgingi sanyndajarııalanǵan «Memleket basshysy bergen tapsyrma oryndaldy!» degen maqalasynda. Maqalada Qazaqstannyń ishki jalpy ónimi 7,1 paıyzdy quraǵandyǵy habarlanady. Al elimizdegi jumyssyzdyq deńgeıi 5,4 paıyz bolyp otyr. Bul AQSh-tyń 9,8 paıyzdyq deńgeıge jetken jumyssyzdar sanynan az kórsetkish. «Onyń ústine, el Úkimeti Elbasynyń tapsyrmasy boıynsha, jumyssyzdar sanyn alda azaıta bermek. Bul maqsatqa «Jumyspen qamtý - 2020» baǵdarlamasy qyzmet etetin bolady», - delingen maqalada.
***
«Alash aınasy» basylymy búgingi nómirinde Shubarshy kentindende eldi dúrliktirgen oqıǵaǵa qatysty materıal usynyp otyr. Esterińizde bolsa, 30 maýsym kúni belgisiz qylmyskerler Aqtóbe oblysy Shubarshy kentinde polıtsııa qyzmetkerlerin óltirip, olardyń qarýlaryn tartyp áketken bolatyn. Keıinnen 9 shilde kúni kúdiktilerdi quryqtaý operatsııasy barysyndaǵy qaqtyǵys kezinde 9 adam óltirilgen edi. Qandy oqıǵa jaıynda gazettiń «Aqtóbedegi lańdy dinniń atyn jamylyp, munaı urlaýmen aınalysqan qylmystyq top jasapty» degen taqyryppen berilgen maqalasynan oqı alasyzdar.
Sonymen qatar «Alash aınasynyń» búgingi sanynda «Qazaq polıtseılerine qarsy «jıhad» jarııalanǵany ras pa?» degen taqyryppen maqala basyldy. Onda ótken aptada Balhash qalasynyń AK 156/21 jalpy rejimdegi túzeý mekemesinde bolǵan atys-shabys pen aqpan aıynda 168/2 túzeý mekemesiniń janyndaǵy kóliktiń jarylýy arasyndaǵy oqıǵalardy keltire otyryp, «Buryn-sońdy estı bermeıtin oqıǵalar nege endi beleń ala bastady? Elimizde dinı-ekstremıstik, radıkaldy sektalarǵa qarsy kúrestiń óz deńgeıinde bolmaı, sektalardyń semirgeni me?», - degen saýal tastalady. Ary qaraı qazaq polıtseılerine «jıhad» jarııalaýshy «pátýalar» jaıynda áńgime qozalady.
***
«Shanhaı yntymaqtastyq uıymynyń múshe memleketter basshylary qatysqan mereıtoılyq sammıtiniń qorytyndylary men ulttyq jastar uıymdarynyń aımaqtyq qarym-qatynasy 9 shilde kúni Almatyda ótken ShYU Jastar keńesiniń ІV otyrysyna talqylandy», - dep habarlaıdy «Kazahstanskaıa pravda» gazeti «10 let ıstorıı ı býdýşego» atty maqalasynda. Basylymnyń málim etýinshe, atalǵan keńeste Qazaqstan atynan eki uıym - «Nur Otan» HDP «Jas Otan» jastar qanaty men Qazasqtannyń jastar kongresi ókildik etken. Jıyn qatysýshylary Astana onjyldyq deklaratsııasyn qoldaıtyndyqtaryn aıtyp, jastar uıymdaryn ondaǵy qaǵıdattar boıynsha jumys jasaýǵa úndegen.
