Aqtóbedegi kórme: Qumaı tazynyń baǵasy qansha
AQTÓBE. QazAqparat -Aqtóbe qalasynda qumaı tazylar kórmesi ótti. Kórmege 50-ge jýyq tazy ákelindi, dep habarlaıdy QazAqparat tilshisi.
Aqtóbede oblysy boıynsha tazy asyryp, baǵyp otyrǵandar búgin ortalyqqa jınaldy. Maqsat -qala turǵyndaryna tazyny nasıhattap, onyń ań aýlap, mal baǵatyn qasıetterin túsindirý.
«Ózimde 7 tazy ıti bar. Asharshylyq jyldarynda bir aýyldy asyraǵan tazy qazaqtyń brendine aınalýy tıis. Sondyqtan bar, toq zamanda ony dáriptep, saqtap qalýǵa kúsh salýymyz kerek. Kórme de tazyny dáriptep, keń tanytýǵa arnalǵan. Tazynyń bárin ańshylyq maqsatta paıdalanyp júrmin», - dedi tazy asyraýshy Ǵabıt Seıitjanov.
Onyń aıtýynsha, tazy asyryp otyrǵan aqtóbelikter patent alýdy kózdep otyr. Bul paıda úshin emes, ulttyq brendti ózgeniń menshigine bermeý úshin atqarylyp jatqan jumys.
«Bıyl Baıǵanın aýdany «qasqyr malǵa shaýyp, maza bermeı jatyr» degen soń baryp, kómektestik. Tazy eki qasqyr aldy. Ereksheligi, qaı ańǵa salsań da tazy alady. Tazynyń naqty baǵasyn aıtý qıyndaý, biraq ańǵa shyǵa alatyn tazyny 1-2 myń dollarǵa suraıdy», - dedi Ǵabıt Seıitjanov.
Al taǵy bir tazy asyraýshy aqtóbelik Beıbithan Tumarǵalıev tazyny patentteýge qatysty pikir bildirdi.
«Tazy asyrap, baǵamyn degen adamǵa kúshik kezinde tegin beremiz. Osy arqyly tazy sharýashylyǵyn damytýdy kózdep otyrmyz. Jyldamdyǵy saǵatyna 70-80 shaqyrym bolatyn tazynyń sanyn 1 myńnan asyrý kerek. Sonda ǵana patent alýǵa jol ashylady», - deıdi ol.
