Aqtóbedegi kópir mańynan tabylǵan balalardyń ata-analary áli izdestirilip jatyr
AQTÓBE. QazAqparat - Aqtóbede 1,5 jáne 2 jastaǵy balalardyń ata-analary áli izdestirilip jatyr. Úmit sábıler úıine jetkizilgen balalar arnaıy medıtsınalyq tekserýden ótkizildi, dep habarlaıdy QazAqparat tilshisi.
Aqtóbe qalasyndaǵy Zarechnyı-1 eldi mekenindegi kópir mańynda júrgen balalardy turǵyndar keziktirip, keıin polıtsııaǵa habar bergen. Sodan beri olardyń ata-analaryn izdeý jumysy júrip jatyr. Degenmen nátıje joq.
«Balalar tabylǵan jerge baryp, izdeý jumystaryn júrgizdik. Baý-baqsha ujymyndaǵy turǵyndar olardy tanymady. Balalar óz attaryn aıta almaıdy, sóılemeıdi. Kishkentaılar ýaqytsha «Úmit» sábıler úıine berildi»,- dedi Zarechnyı polıtsııa bóliminiń kámeletke tolmaǵandar isi jónindegi ınspektory Elvıra Tarǵynova.
Sábıler úıiniń qyzmetkerleri balalardy jýyndyryp, taza kıimder kıgizdi. Arnaıy medıtsınalyq tekserýden áli ótkizilip jatyr. Tipti laqap at qoıǵan.
«Balalarǵa sýyq tıip, aýyrdy. Qazir jaǵdaılary jaqsy, em qabyldap jatyr. Olardyń damýynda eshqandaı kinárat joq. 2 jastaǵy er bala birneshe sóz aıta alady. Al kishkentaı qyz sóılemeıdi. Ulǵa Medet dep at qoıyldy. Eger bir aıda olardyń ata-anasy tabylmasa qujattar daıyndalady»,- dedi «Úmit» sábıler úıiniń bas dárigeri Qadyrbek Imanbaev.
