Aqtóbedegi kólik jarylysy: Júrgizýshisi oqıǵanyń qalaı bolǵanyn aıtyp berdi
AQTÓBE. QazAqparat - Aqtóbede janar-jaǵarmaı tasıtyn kólik jarylyp, úsh adam aýrýhanada jatyr. Kólik júrgizýshisi oqıǵanyń qalaı bolǵanyn aıtyp berdi, dep habarlaıdy QazAqparat tilshisi.
Aqtóbedegi óndiristik aımaqta janar-jaǵarmaı kóligi jarylyp, úsh adam zardap shekti. Oblystyq jedel járdem aýrýhanasynyń bas dárigeri Sáken Qapanovtyń málimdeýinshe, eki naýqas jansaqtaý bóliminde jatyr. Al búgin aýrýhanada kólik júrgizýshisiniń de jatqany belgili boldy.
«Men aýrýhanada jatyrmyn, qulaǵym jáne qolymda kúıik bar. Túnde dene qyzýym kóterilip, mazam bolmady. Oqıǵa bolǵan kúni janar-jaǵarmaı quıý kóliginiń janynda eki operator jumys istep, qaýipsizdik erejesi boıynsha men olardy baqylap turdym. Birinshi syıymdylyqtaǵy benzın quıylyp, operatorlar ekinshisine kiristi. Sol kezde kenetten jarylys boldy. Operator Serikbaı Palvanovtyń kıimi órtenip, júgire bastady. Men óz ústimde janyp jatqan kıimdi sheship, Serikbaıdyń kıimderin julyp, sheshindirdim. Artyma qarasam Zıbagúl de janyp jatty. Órttiń qalaı shyqqanyn aıta almaımyn»,- dedi zardap shekken júrgizýshi Bolat Sársenov.
Aıta keteıik, zardap shekkender oblystyq jedel járdem aýrýhanasynda tegin em qabyldap jatyr. Arnaıy qurylǵan komıssııa tergeý jumystaryn bastady.
«Kompanııanyń óz órt sóndirýshisi bar. Olar lezde iske kiristi. Al jedel járdem shaqyrylǵanymen, olardy kútip otyrmadyq. Biz medbıkeni ertip alyp, Óz kóligimizben aýrýhanaǵa bardyq»,- dedi B.Sársenov.
