Aqtóbedegi kólik jarylysy: Eńbek ınspektorlary jumys berýshiniń kinásin anyqtady
AQTÓBE. QazAqparat - Aqtóbede janar-jaǵarmaı tasıtyn kólik jarylyp, eki adam kóz jumdy. Aqtóbe oblystyq eńbek ınspektsııasy buǵan jumys berýshiler kináli dep otyr, dep habarlaıdy QazAqparat tilshisi.
Aqtóbe qalasyndaǵy janar-jaǵarmaı tasıtyn kólik jarylysyna baılanysty oblystyq eńbek ınspektsııasy tekserý júrgizdi. Tekserý bir aıǵa sozylyp, ınspektorlar jumys berýshilerdiń kináli ekenin anyqtady.
«Úsh adam jaraqat alyp, eki adam kóz jumdy. Eńbek kodeksine sáıkes tekserý ýaqyty uzartyldy. Birer kúnde naqty sheshim shyǵady. Aldyn ala belgili bolǵany, ınspektorlar jumys berýshi 100 paıyz kináli dep otyr. Biraq jumys berýshi ony moıyndap jatqan joq. Kýágerlerdiń aıtýynsha, operatorda uıaly telefon bolǵan. Talap boıynsha olar uıaly telefondy óndiristik aımaqqa kirmes buryn tapsyrýlary kerek edi. Jarylys bolǵan jerden sol telefon tabyldy. Aqtóbe oblystyq tótenshe jaǵdaılar qyzmeti jarylys telefonnan bolýy múmkin dep otyr»,- dedi Aqtóbe oblystyq eńbek ınspektsııasy basqarmasy basshysynyń mindetin atqarýshy Baýyrjan Ýrazaev.
Aıta keteıik, 10-qyrkúıek kúni Aqtóbedegi óndiristik aımaqta janar-jaǵarmaı tasıtyn kólik jarylyp, úsh adam aýrýhanaǵa túsken bolatyn. Keıin jansaqtaý bóliminde jatqan eki jumysshy kóz jumdy.
Aıta keteıik, osy jyldyń 9 aıynda 51 adam óndiriste túrli jaraqat aldy. Jumysshylardyń 10-y alǵan jaraqatynan qaza boldy. «Kóktas-Aqtóbe», «Aqtóbe mys kompanııasy», «Aqtóbe-Sáýlet», «Shahanov servıs», «OPS Sekıýrıtı», «KTP» JShS-de jumysshynyń jaralanýy qaıǵyly oqıǵamen aıaqtaldy.
