Aqtóbedegi kólik jarylysy: Eki naýqas aýrýhanada jan tapsyrdy
AQTÓBE. QazAqparat - Aqtóbe oblystyq jedel járdem aýrýhanasynyń jansaqtaý bóliminde em qabyldaǵan Zıbagúl Tıýmenbaeva men Serikbaı Palvanov kóz jumdy, dep habarlaıdy QazAqparat tilshisi.
Aqtóbeniń óndiristik aımaǵynda janar-jaǵarmaı tasıtyn kólik jarylyp, úsh adam zardap shekken bolatyn. Saldarynan eki operator jansaqtaý bólimine túsip, dárigerler olardyń jaǵdaıy aýyr ekenin habarlady. Al denesiniń 80-90 paıyzyn kúıik shalǵan 55 jastaǵy Zıbagúl Tıýmenbaeva men Serikbaı Palvanov aýrýhanada kóz jumdy.
"Eki naýqas termıkalyq kúıikten kóz jumdy. Er adam 15 qyrkúıekte, áıel adam 17 qyrkúıek kúni tańda jan tapsyrdy. Múrde sot-medıtsınalyq zertteýge jiberildi", - dep habarlady oblystyq densaýlyq saqtaý basqarmasynyń baspasóz qyzmeti.
Aıta keteıik, kólik júrgizýshisi Bolat Sársenov aýrýhananyń travmatologııa bóliminde em qabyldaýyn jalǵastyrdy.
"Men áli em qabyldap jatyrmyn. Egip, kúıikti tańyp, maı jaǵyp jatyr. Áli bir apta aýrýhanada bolamyn", - dedi zardap shegýshi Bolat Sársenov.
Eske salsaq, iri janar-jaǵarmaı kompanııasyndaǵy jarylysqa baılanysty eńbek ınspektsııasy tergeý jumystaryn bastady.
