Aqtóbedegi Kókjıde jerasty sýynyń qoryn anyqtaýǵa 1 mlrd teńgeden astam qarjy kerek
AQTÓBE. QazAqparat – Kókjıde ken ornynda qazir bes munaı kompanııasy jumys istep jatyr. Munaı shyǵyp jatqan jerdegi tuşy sýdyń naqty qoryn anyqtaýǵa 1,1 mlrd teńge qarjy kerek, dep habarlaıdy QazAqparat tilshisi.
Aqtóbede «Kókjıde» tuşy sý qory bar. Temir jáne Muǵaljar aýdandaryndaǵy sý qory Úkimet Qaýlysymen asa ekologııalyq, ǵylymı jáne mádenı jaǵynan mańyzdy retinde respýblıkalyq jáne halyqaralyq mańyzy bar memlekettik tabıǵı-qoryqtyq qordyń geologııalyq jáne gıdrogeologııalyq tizimine endi. Munda 2008 jyldan beri ekologııalyq zertteýler júrgizilip keledi. Zertteýdiń nátıjesi boıynsha «Kókjıde» qumdarynyń munaı ónimderimen lastanǵany baıqalady.
«2008-2018 jyldary júrgizilgen zertteýlerdiń málimetteri boıynsha munaı óndiretin kompanııalar «Kókjıde» jerasty sýlarynyń sapaly quramyn jazda jáne kúzde lastap kelgen. Qazirgi tańda «SNPS-Aqtóbemunaıgaz» AQ, «KMK Munaı» AQ, «Ýrıhtaý Opereıtıng» JShS, «Fırma Ada Oıl» JShS, «QazaqoılAqtóbe» JShS syndy bes munaı kompanııasy «Kókjıde» jerasty sýlarynyń ken oryndarynda kómirsýtek shıkizatyn barlap, óndirip jatyr. 2018 jyly shekti ruqsat etilgen kontsentratsııanyń artýy tek ShRK 10-M -2,63 uńǵymasynda ǵana anyqtalǵan. Aldaǵy ýaqytta QR Ekologııa, geologııa jáne tabıǵı resýrstar mınıstrliginde múddeli organdar men jer qoınaýyn paıdalanýshylar qatysatyn jıyn josparlanyp otyr. Ol jerde «Kókjıde» jerasty sýlarynyń problemalary sheshilmek», - dep habarlady oblys ákiminiń baspasóz qyzmeti.
Aıta keteıik, oblystyq ekologııa departamenti bıyl «KMK Munaı» AQ men «Fırma Ada Oıl» JShS-ne tıesili uńǵymalardy tekserip, jerasty sýlarynyń munaımen lastanýyn tirkedi. «KMK Munaı» AQ-nyń kelisimsharttyq jerlerindegi tórt baqylaý uńǵymasynda 1,3 shekti ruqsat etilgen kontsentratsııadan (ShRK) 8 ShRK-ǵa deıin artqany, «Fırma Ada Oıl» JShS-de eki baqylaý uńǵymalary boıynsha 1,66 ShRK-dan 1,82 ShRK-ǵa deıin óskeni anyqtaldy. Aqtóbe oblystyq ekologııa departamenti mınıstrlikke birneshe usynys berdi. Sonyń biri - Aqtóbe oblysyndaǵy Kókjıde ken ornydaǵy jerasty sýlarynyń eksplýatatsııalyq qoryn qaıta baǵalaý maqsatynda tolyq barlaý. Bıyl bul jumysqa 300 mıllıon teńge bólingen. Biraq jumys tolyq iske asýy úshin 1,1 mıllıard teńge qajet.
«Kókjıde» qumdary aýmaǵynda kómirsýtek shıkizatyn barlaý jáne óndirýdiń biryńǵaı erejesin ázirleý, «Kókjıde qumdary» men «Kókjıde» jerasty sýlarynyń memlekettik tabıǵı-qoryqtyq qory nysandarynyń jaǵdaıyna monıtorıng júrgizý úshin biryńǵaı operator bekitý, «Kókjıde» jerasty sýlary ken ornynyń geologııalyq qurylysyn anyqtaý sharalaryn júrgizý, Jer qoınaýyn paıdalanýshylardyń árqaısysyna jeke-jeke monıtorıngtik zertteý júrgizý usynyldy», - dep habarlady oblys ákiminiń baspasóz qyzmeti.
