Aqtóbedegi ken ornynyń jumysshysyn vagon súırep ketti
AQTÓBE. QazAqparat - Aqtóbedegi Dóń ken-baıytý kombınatynyń jumysshysy Aslan Qojaǵulovty ken ornynda vagon súırep ketti. Ol birneshe dene jaraqatymen aýrýhanaǵa tústi, dep habarlaıdy QazAqparat tilshisi.
Aqtóbedegi Dóń ken-baıytý kombınatynda taǵy da oqys oqıǵa tirkeldi. Ken ornynda jarylys jasaýshy bolyp jumys isteıtin A.Qojaǵulovtyń qabyrǵasy synyp, jabyq bas-mı jaraqatyn aldy.
«Shahtada jarylys jasaýshy bolyp jumys isteıtin adam jaralanyp, aýdandyq aýrýhanaǵa jetkizildi. Naýqastyń aıtýynsha, onyń sómkesi vagonǵa ilinip qalyp, súırep ketken. Jabyq bas-mı jaraqatyn aldy. Bet terisi zaqymdandy. Qazirgi kezde ol Aqtóbe qalasyndaǵy jedel járdem aýrýhanasynyń hırýrgııa bóliminde em qabyldap jatyr. Jaǵdaıy turaqty», - dedi Hromtaý aýdandyq aýrýhanasynyń bas dárigeri Joldasbek Qambarov.
Eńbek ınspektsııasynyń mamandary Dóń ken-baıytý kombınatynda tekserý jumystaryn bastady.
Eske salsaq, 12-qazan kúni Dóń ken-baıytý kombınatynyń jumysshysy ken astynda qalyp, dene jaraqatymen aýrýhanaǵa tústi. Aqtóbe oblystyq eńbek ınspektsııasy basqarmasy bul derekti de tekserip jatyr.
