Aqtóbedegi kásipker ólimi: Tergeý jumystary qaıta jandandy
AQTÓBE. QazAqparat - Aqtóbelik kásipker Erhan Tileýimbetovtiń ólimine qatysty isti tergeý qaıta jandandy. Al prokýratýra polıtsııa qaýlysynyń zańdylyǵyn tekserip jatyr, dep habarlaıdy QazAqparat tilshisi.
Kásipker Erhan Tileýimbetovtiń ólimine qatysty tergeý jumystary 6 qarasha kúni qaıta jandandy. Bul týraly QR Іshki ister mınıstrliginiń baspasóz qyzmeti málim etti.
«Jedel izdestirý, tergeý jumystary kezinde kúdikti tabylmady. Sol sebepti Qylmystyq-protsestik kodekstiń 45-baby, 7-bóligi, 1-tarmaǵy boıynsha tergeý jumystary ýaqytsha toqtatylyp, jábirlenýshi tarap 2018 jyldyń 30 qazany kúni qaýly aldy. Degenmen isti tergeý toqtatylmaıdy, qosymsha tergeý jospary daıyndalyp, iske asyrylyp jatyr. Ári 6 qarasha kúni qylmystyq isti tergeý qaıta jandandy. Tergeý jumystary Іshki ister mınıstrliginiń baqylaýynda tur», - dep habarlady ІІM baspasóz qyzmeti.
Al oblystyq prokýratýra oblystyq polıtsııa departamentiniń qaýlysyn tekserýge kóshti.
«2017 jyldyń tamyz aıynda oblystyq ІІD-i Erhan Tileýimbetovtiń joǵalýy men ólimine qatysty Qylmystyq kodekstiń «Adam óltirý» baby boıynsha tergeýdi bastady. Tergeý kezinde kúdikti adam anyqtalmady. Soǵan baılanysty sot aldy tergeý jumystary 2018 jyldyń 30 qazany kúni toqtatyldy. Aqtóbe oblystyq prokýratýrasy sheshimniń zańdylyǵyn tekserip jatyr», - dedi Aqtóbe oblystyq prokýratýrasynyń basqarma basshysy Azamat Kýstanov.
Eske salsaq, Erhan Tileýimbetov 2017 jyldyń 3 tamyz kúni bazarǵa baryp, keıin iz-túzsiz joǵalyp ketti. Eki balanyń ákesin jan-jaqtan izdeý jumystary júrgizilgenimen, polıtsııa qyzmetkerleri ol otyryp ketken kóliktiń nómirin beınekameradan anyqtaı almady.
Kásipkerdiń anasy Raıhan Esenamanova jalǵyz ulyn ustap otyrǵan adamdarǵa úndeý joldap, bosatýyn surady. Al 2017 jyldyń qyrkúıeginde Erhan Tileýimbetovtyń máıiti bólshektelgen kúıinde tabylyp, týystary ony kıimi arqyly tanydy.
